Bir hafta ichida O‘zbekistonda yangi hosil tarvuzining ulgurji narxlari deyarli uch baravarga pasaydi — bu kamida so‘nggi besh yil ichida xuddi shu davrdagi eng keskin pasayish bo‘ldi.
EastFruit mutaxassislarining ta’kidlashicha, bunday tez pasayishning asosiy sababi ichki bozorda ushbu mahsulotlar taklifi hajmining keskin oshishi bo‘lgan.
Toshkentning ulgurji bozorlariga tarvuzning dastlabki yirik partiyalari 16−22 may oralig‘ida, o‘tgan yilga nisbatan taxminan bir hafta oldin yetib kelgan.
EastFruit narx kuzatuvi ma’lumotlariga ko‘ra, 2025-yil 23-may holatida o‘rtacha ulgurji narx bir kilogramm uchun 7000 so‘mni ($0,54) tashkil etdi. Bu 2021-yildan buyon shu davrdagi eng yuqori ko‘rsatkichdir.
Biroq atigi bir hafta ichida 23-maydan 30-maygacha — o‘rtacha ulgurji narx 2,8 barobar pasayib, bir kilogramm uchun 2500 so‘mga ($0,20) tushdi. Bu so‘nggi besh yil ichida qisqa muddat davomida narxlarning pasayish tezligi bo‘yicha rekord o‘rnatdi.
May oyi oxiriga kelib, O‘zbekistonda tarvuzning o‘rtacha ulgurji narxi o‘tgan yilning shu davridagi narxdan ikki baravar past bo‘lsa-da, 2021-yil may oyi oxiridagi ko‘rsatkichdan hamon 25% yuqori edi.
O‘zbekistonda mavsum boshidayoq tarvuz narxining bunday keskin tushishi ushbu mahsulotni tashqi bozorlarga yetkazib berishni ko‘paytirishga turtki bo‘lmoqda.
2020-yildan beri yangi tarvuz meva-sabzavot tarmog‘ida O‘zbekistonning asosiy eksport mahsulotlaridan biriga aylanib bormoqda.
2023-yilda mamlakat tarvuz eksporti hajmi bo‘yicha rekord o‘rnatdi — 104,7 ming tonna, va o‘tgan 2024-yilda ham jo‘natmalar hajmi yuqori darajada qoldi — 98,5 ming tonna, bu rekord ko‘rsatkichdan atigi 6%ga kamroq.
Avvalroq EastFruit O‘zbekistonda o‘rik narxi so‘nggi ikki hafta ichida uch barobar arzonlashgani haqida xabar bergandi.
May oyi boshida bir kilogramm o‘rik narxi 15 ming so‘mni tashkil etgan bo‘lsa, 23-mayga kelib narx 5000 so‘mgacha pasaygan.
