11-may kuni Toshkentda O‘zbekiston-Mo‘g‘uliston biznes-forumi bo‘lib o‘tdi. Bu haqda Investitsiyalar, sanoat va savdo vazirligi matbuot xizmati xabar berdi.
Tadbirda 70 dan ortiq kompaniya vakillari ishtirok etdi. Delegatsiyalarga investitsiyalar, sanoat va savdo vaziri o‘rinbosari Ilzat Qosimov, Mo‘g‘ulistonning Toshkentdagi elchisi Dadanxu Batbaatar va Mo‘g‘uliston parlamenti deputati Suxbaatar Erdenebat boshchilik qildi.
Tadbirda ta’kidlanganidek, birinchi chorak yakunlariga ko‘ra, O‘zbekistonning Mo‘g‘ulistonga eksporti 15,6% ga oshdi. Tomonlar o‘zaro tovar ayirboshlash hajmini $100 mlnga yetkazishni maqsad qilgan.
Eksport uchun mo‘g‘ul juni va kashmirni qayta ishlash sohasida sanoat kooperatsiyasi muhokama qilindi. Kelgusi to‘rt yilda mo‘g‘ul qo‘ylari bosh sonini 1 mlnga yetkazish, shuningdek, Mo‘g‘ulistonda O‘zbekiston sug‘orish tizimlarini joriy etish rejalashtirilgan.
Shuningdek, O‘zbekiston-Qirg‘iziston-Xitoy-Mo‘g‘uliston yo‘lagi bo‘ylab yuk tashuvlarini yo‘lga qo‘yish masalasiga ham to‘xtalib o‘tildi.
Bundan tashqari, O‘zbekiston Geologiya vazirligining Ulan-Batordagi vakolatxonasi foydali qazilma konlarini o‘zlashtirish bo‘yicha ishlarni boshladi.
Biznes-forumda Mo‘g‘ulistonning Tsamkhag Construction, Prime Nomadic Meat, Suzur Health Med va boshqa kompaniyalari ishtirokida korporativ muzokaralar (B2B, G2B) bo‘lib o‘tdi.
Tomonlar investitsiya loyihalari to‘plamini shakllantirdilar va qo‘shma tashabbuslarni qo‘llab-quvvatlash mexanizmini ishlab chiqdilar.
Avvalroq Spot O‘zbekiston Kaspiy dengizida paromlarni ijaraga yoki sotib olishni ko‘rib chiqayotgani haqida xabar berilgandi.
