Markaziy bank mamlakat ichidagi milliy valyutadagi barcha to‘lovlarni qayta ishlashni ta‘minlashi kerak bo‘lgan milliy to‘lov svitchini yaratish ustida ish olib bormoqda. Loyihaning amalga oshirilishi prezident qarori bilan tasdiqlangan jadvalga muvofiq kechmoqda. Bu haqda Markaziy bankning To‘lov tizimlarini rivojlantirish departamenti rahbari Jamshid Usmanov Spot‘ga bergan intervyusida ma‘lum qildi.
2025-yil noyabrda prezident so‘mdagi barcha to‘lovlar o‘tkaziladigan yagona to‘lov svitchi tizimini yaratish bo‘yicha topshiriq bergandi. Loyiha naqd pulsiz hisob-kitoblarning xavfsizligi va barqarorligini oshirishga qaratilgan. 2026-yilda Markaziy bank zarur me‘yoriy-huquqiy bazani tayyorlashni yakunlashi lozim, tizimni texnik jihatdan tatbiq etish esa keyingi bosqichlarda amalga oshirilib, 2027-yilda ishga tushirilishi rejalashtirilgan.
Usmonovning so‘zlariga ko‘ra, to‘lov svitchi mamlakat ichidagi operatsiyalar o‘tkaziladigan yagona infratuzilmaga aylanadi. Hozirda xalqaro bank kartalari bo‘yicha tranzaksiyalarning bir qismi xorijiy protsessing markazlari tomonidan qayta ishlanayotgan bo‘lsa, yangi tizim bunday operatsiyalarni qayta ishlashni O‘zbekistonga ko‘chirish imkonini beradi.
“Mamlakatlar asta-sekin milliy svitchlarga o‘tmoqda, chunki bu xorijiy kompaniyalardan mustaqillikni yaratadi va bu ma‘lumotlarning barchasini o‘z mamlakatida qayta ishlash imkoniyatini beradi”, — deya qayd etdi u.
Markaziy bank vakilining tushuntirishicha, milliy svitchning joriy etilishi to‘lov infratuzilmasining barqarorligini va ma‘lumotlar himoyasi darajasini ham oshiradi. Uning so‘zlariga ko‘ra, ayni paytda regulyator joriy yil uchun ko‘zda tutilgan me‘yoriy hujjatlarni qabul qilish bilan shug‘ullanmoqda, loyihaning texnik implementatsiyasi esa keyingi yillarda amalga oshiriladi. Usmanov loyiha tasdiqlangan jadvalga muvofiq amalga oshirilayotganini alohida ta‘kidladi.
Spot, avvalroq, O‘zbekistonda 265 mingdan ortiq tadbirkor yagona QR-kodga ulangani haqida yozgandi.
