“Bozorlarimiz Mega Planet yoki Magic City misolida rivojlanmasligi kerak” — Umurzakov

Toshkentda birorta ham bozorni yopish yoki uning avvalgi faoliyatini bekor qilish rejalashtirilmayapti. Biroq shahar hokimiyati mavjud savdo maskanlarini modernizatsiya qilishni rejalashtirmoqda. Bu haqda poytaxt hokimi Shavkat Umurzakov O‘zA axborot agentligiga bergan intervyusida ma’lum qildi.

Uning so‘zlariga ko‘ra, prezidentning 27-iyuldagi qarorida uchta asosiy yo‘nalish belgilangan: bozorlarni modernizatsiya qilish, gavjum ko‘chalarni rivojlantirish va avtoturargohlar tizimini yaratish.

Umurzakov bozorlarni eng murakkab yo‘nalishlardan biri deb atadi. U “Bozorga ham, mozorga ham tegma” degan xalq maqolini keltirib, bu so‘zlar ortida asosli xavotirlar borligini ta’kidladi. Odamlar tirikchilik qiladigan, o‘rganib qolgan joylarning o‘zgarishi tabiiy ravishda xavotir uyg‘otadi.

Shu bilan birga, hokimning fikricha, hozirgi bozorlar na tashqi ko‘rinishi, na biznes modeli jihatidan zamonaviy talablarga javob beradi. Shu sababli investorlarga 35 ta davlat bozori va savdo majmuasi taklif qilinmoqda.

“Lekin bir narsani aniq aytaman: birorta ham bozor yopilmaydi va o‘z funksiyasini yo‘qotmaydi”, — deya ta’kidladi hokim.

Bunda investorlar oldiga uchta shart qo‘yiladi. Ular belgilangan hajmdagi savdo rastalarini zamonaviy formatda qurib, davlatga topshirishi, amaldagi tadbirkorlarning ish o‘rinlarini saqlab qolishi va yetarli sig‘imga ega avtoturargoh yaratishi kerak bo‘ladi.

Investor savdo, xizmat ko‘rsatish va ko‘ngilochar obyektlarni faqat samarasiz foydalanilayotgan maydonlarda qurish huquqiga ega bo‘ladi.

Umurzakov Ekobozor’ni misol qilib keltirib, ushbu model o‘z samaradorligini allaqachon ko‘rsatganini qayd etdi. Uning fikricha, bozorlarni rivojlantirishda xalqaro tajribadan ham foydalanish mumkin.

U Rotterdamdagi Markthal va Lissabondagi Time Out Marketni misol sifatida keltirdi. Uning aytishicha, bu obyektlar tarixiy bozor funksiyasini saqlab qolgan holda, shaharning eng gavjum maskanlaridan biriga aylangan.

“Bizning bozorlarimiz ham aynan shunday, o‘z milliy qiyofasini saqlagan holda rivojlanishi kerak, Mega Planet yoki Magic City misolida emas”, — deya xulosa qildi poytaxt hokimi.

Sotiladigan obyektlar qatorida Aviasozlar, Qoraqamish, Qo‘yliq, Navro‘z, Sergeli, Farhod dehqon bozorlari, Bek to‘pi va Chilonzor savdo komplekslari avtoturargohi bor. Shuningdek, Navro‘z bozorining 7 ta, Sergeli bozorining 6 ta, Qoraqamish’ning 5 ta filiali va Yunusobod bozorining 2 ta shoxobchasi ham auksionga chiqariladi.

Ommaviy savdolarga chiqariladigan bozorlar va savdo komplekslari hamda ularning shoxobchalari ro‘yxati:

Avvalroq Spot Toshkentdagi Yangiobod bozori formati va savdo joylari saqlangan holda modernizatsiya qilinishi haqida yozgandi.