O‘zbekistonliklarning inflyatsion kutilmalari kuzatuvlar davridagi minimumni yana bir bor yangiladi. Bu haqda Markaziy bank xabar berdi.
Avgust oyidagi so‘rov natijalariga ko‘ra, kelgusi 12 oydagi narxlar o‘sishining o‘rtacha prognozi 9,8% ni tashkil etdi — bu iyun va iyul oylariga nisbatan 0,3% ga kam. Median ko‘rsatkich bir oy oldingi sakrashdan so‘ng yana 8% ga qaytdi.
Hududlar orasida kutilayotgan inflyatsiyaning eng yuqori ko‘rsatkichi Farg‘ona viloyatida (11,7%) qayd etildi, undan keyingi o‘rinlarda Toshkent shahri (11,4%) va Surxondaryo viloyati (10,9%) bormoqda. Eng past ko‘rsatkichlar Jizzax (8,1%), Xorazm (8,4%), Navoiy va Buxoroda (8,6 foizdan) qayd etildi.
Kasblar kesimida IT sohasi vakillari eng yuqori prognozlarni berdi — 11,4%, shuningdek, xizmat ko‘rsatish (11,1%) va transport (10,9%) sohalarida ham baholar o‘rtacha ko‘rsatkichdan sezilarli darajada yuqori bo‘ldi. Eng optimistik prognozlar qishloq xo‘jaligi xodimlari va talabalar (8,7%) orasida qayd etildi.
Oyiga 30 mln so‘m va undan yuqori daromadga ega fuqarolar yana narxlar o‘sishi bo‘yicha eng yuqori prognozlarni qayd etishdi — o‘rtacha 15,8%. Ikkinchi o‘rinni 15−20 mln so‘m daromadli guruh (12,4%) egalladi, 7−15 mln va 20−30 mln so‘m daromadli guruhlarda esa baholar 10,5−11% atrofida bo‘ldi.
Eng past inflyatsion kutilmalar 2 mln so‘mgacha (7,9%), shuningdek, 2−4 mln so‘m (9%) daromad egalarida kuzatildi.
Narxlar prognoziga ta‘sir qiluvchi omillar orasida eng ko‘p uy-joy kommunal xizmatlari tariflari va energiya resurslari xarajatlarining oshishi qayd etildi (mos ravishda 53% va 52% respondentlar tomonidan). Shu bilan birga, ikkala ko‘rsatkich ham iyul oyiga nisbatan biroz pasaygan.
Uchinchi o‘rinni katta farq bilan transport xarajatlari egalladi — 32%. Ish haqi va nafaqalar o‘sishini qayd etgan fuqarolar ulushi biroz oshdi (28%), valyuta kursining tebranishlari esa so‘rovda qatnashganlarning 14% i bilan oxirgi o‘rinda qolmoqda.
Tadbirkorlik muhitida ham inflyatsion prognozlar pasayishda davom etmoqda. O‘rtacha ko‘rsatkich ma‘lumotlar e‘lon qilina boshlaganidan beri eng past darajaga tushdi — 9,6%, bu iyul oyidagi darajadan 0,2% bandga va iyun oyidagidan 0,3% bandga past.
Median baholash aholi o‘rtasidagi raqamlarga o‘xshash dinamikani ko‘rsatdi, u iyul oyida keskin oshib 9% ga yetgan va bir oydan so‘ng yana 8% ga tushgan.
Biznes vakillari orasidagi inflyatsiya prognozlari bo‘yicha Qoraqalpog‘iston 11,5% bilan Farg‘ona viloyatini 0,1% ga ortda qoldirib, birinchi o‘ringa chiqdi. Toshkent viloyati 10,3% ko‘rsatkich bilan kuchli uchlikni yakunladi (poytaxtda bu ko‘rsatkich 9,9%). Eng past baholar Navoiy (8,3%) va Namanganda (8,7%) qayd etildi.
Tarmoqlar bo‘yicha eng yuqori kutilmalar tashish va ta‘lim (10,9%) hamda qishloq xo‘jaligi (10,6%) sohalarida kuzatildi. Hunarmandlarning baholari boshqalarga qaraganda sezilarli darajada past bo‘ldi (7%), shuningdek, savdo (8,7%) va qurilish (9,2%) sohalarida ham past prognozlar qayd etildi.
Energiya resurslari xarajatlarining oshishi prognoz omillari orasida birinchi o‘ringa chiqdi (55%), undan keyin uy-joy kommunal xizmatlari tariflari (50%) va transport xarajatlari (34%) joy oldi. Eng kam soliq yuki va valyuta kursining tebranishlari qayd etildi — mos ravishda 15% va 14%.
Avvalroq Spot Markaziy bank oltin-valyuta zaxiralarini tashqi boshqaruvga o‘tkazishi haqida yozgandi.
