O‘zbekistonning uchta yirik to‘lov tashkiloti — Paynet, Payme va Click — 2026-yilning yanvar-sentabr oylarida jami 1,37 trln so‘m sof foyda oldi.
Bu o‘tgan yilning shu davriga nisbatan 52,3% ga ko‘p. Kompaniyalarning jami tushumi esa 3,2 trln so‘mni tashkil etib, bir yil ichida 42,5% ga oshdi.
Moliyaviy natijaga eng katta hissani Paynet qo‘shdi. Kompaniyaning sof foydasi o‘tgan yilning shu davridagi 330,5 mlrd so‘mdan 780,2 mlrd so‘mga yetdi. Bu 2,4 barobar o‘sishni anglatadi.
Paynet tushumi ham 44,8% ga oshib, 1,75 trln so‘mni tashkil etdi. Kompaniya moliyaviy daromadlari tarkibida 321,1 mlrd so‘mlik dividend tushumini qayd etgan. Ushbu mablag‘ning asosiy qismi dividend daromadlari hisobidan shakllangan.
Foyda bo‘yicha ikkinchi o‘rinni Payme egalladi. Kompaniyaning sof foydasi 9,7% ga oshib, 315,5 mlrd so‘mga yetdi. Bir yil avval bu ko‘rsatkich 287,6 mlrd so‘mni tashkil etgan.
Payme tushumi esa 48,2% ga o‘sib, 791,6 mlrd so‘mga yetdi. O‘tgan yilning yanvar-sentabr oylarida kompaniya 534,2 mlrd so‘m tushum olgan edi.
Click 2026-yilning dastlabki to‘qqiz oyini 275,7 mlrd so‘m sof foyda bilan yakunladi. Bu o‘tgan yilning shu davridagi 282,6 mlrd so‘mlik natijadan 2,4% ga kam.
Shu bilan birga, kompaniya tushumi 30,8% ga oshib, 657,5 mlrd so‘mni tashkil etdi. O‘tgan yilning yanvar-sentabr oylarida bu ko‘rsatkich 502,5 mlrd so‘m bo‘lgan.
