Intellektual mulk agentligi MAKRO supermarketlar tarmog‘i bilan memorandum imzoladi

Adliya vazirligi huzuridagi Intellektual mulk agentligi hamda “DARVOZA SAVDO” MCHJ xususiy kompaniyasi o‘rtasida kontrafakt mahsulotlar savdosining oldini olish, iste’molchilarning huquqlarini himoya qilish sohasida hamkorlikni tashkil qilish hamda kompaniya tarmog‘iga kiruvchi supermarketlarni kontrafaktsiz hududga aylantirish maqsadida hamkorlik memorandumi imzolandi.

Memorandumni imzolashdan ko‘zlangan maqsad kontrafakt mahsulotlar aylanmasining oldini olish, tadbirkorlar o‘rtasida halol raqobatni ta’minlash, iste’molchilarni kontrafakt mahsulotlardan ogoh etish, intellektual mulk ob’ektlaridan noqonuniy foydalanganlik uchun qonuniy javobgarlikni kuchaytirishdan iborat.

Memorandum doirasida “DARVOZA SAVDO” MCHJ o‘z savdo majmualariga mahsulotlarni sotuvga chiqarishdan oldin Agentlik mutaxassislarining kontrafakt yoki kontrafakt emasligi bo‘yicha fikrini olgan holda sotuvga taklif etadi.

Shuningdek, Agentlik, “DARVOZA SAVDO” MCHJning mahsulotlarni sotuvga taklif etishdan oldin dastlabki ko‘rikdan o‘tkazish faoliyati bilan shug‘ullanuvchi xodimlarini sohaga oid bilim va ko‘nikmalarini oshirish bo‘yicha o‘quv kurslar, davra suhbatlar, seminar-treninglar o‘tkazish ishlarini tashkil etadi.

Bundan tashqari, Agentlik vaqti-vaqti bilan “DARVOZA SAVDO” MCHJga qarashli savdo majmualarida kuzatuv ishlarini olib boradi va aniqlangan kontrafakt mahsulotlar haqida “DARVOZA SAVDO” MCHJga bildirgi kiritadi “DARVOZA SAVDO” MCHJ esa, ushbu kontrafakt mahsulotlarni tez fursatlarda savdodan olib tashlash chorasini ko‘radi.