4-apreldan boshlab “Oʻzbekneftgaz” aksiyadorlik jamiyati aksiyalari birja kotirovkalari roʻyxatiga kiritildi. Bu haqda “Toshkent” FBB sayti xabar berdi.
Bunda:
- oddiy aksiyalar (UZNG) UZ7036270005;
- imtiyozli aksiyalar (UZNGP) UZ7036271003.
Davlat “Oʻzbekneftgaz” fond birjasi listingini oʻtgan yil oxirida tasdiqlagan edi. Tegishli qaror 30-dekabr kuni kompaniyaning 100% oddiy aksiyalari egasi Moliya vazirligi tomonidan qabul qilindi.
“Oʻzbekneftgaz” aksiyalarini birlamchi (IPO) va ikkilamchi (SPO) joylashtirish rejalari birinchi marta 2019-yilning yozida maʼlum boʻldi. Joylashtirishning oxirgi muddati 2024-yil edi. Shu bilan birga, davlat kompaniya ustidan nazoratni saqlab qolishni rejalashtirgan (51% aksiyalar).
Kompaniya aksiyalarini “Toshkent” FBB birja kotirovkalari varaqasiga kiritishga tayyorgarlik 2021-yil avgust oyida boshlangan. Oʻsha paytda kompaniyaning faqat imtiyozli aksiyalari (24,31 mln dona) erkin muomalada boʻlgan. Savdo maydonchasidagi bitta aksiyaning narxi 720 soʻmdan 3000 soʻmgacha, nominal qiymati 500 soʻmni tashkil qildi.
Oʻtgan yilning sentabrida Fitch “Oʻzbekneftgaz"ga barqaror prognozli BB-kredit reytingini bergan boʻlsa, keyinchalik S&P Global Ratings tomonidan ham xuddi shunday reyting berilgan edi. Noyabr oyida kompaniya oʻzining birinchi yevroobligatsiyalarini $700 mln ga chiqardi.
