Iqtisodiy tadqiqotlar va islohotlar markazi ko‘chmas mulk bozorida ro‘y bergan o‘zgarishlarni tahlil qildi.
Yanvar oyida 18 mingta ko‘chmas mulk oldi-sotdi bitimlari ro‘yxatga olindi, bu 2022-yil dekabr oyiga nisbatan 19,7%ga ko‘pdir.
Eng yuqori o‘sish sur’atlari Qoraqalpog‘istonda — 3 baravar, Namangan — 78,3% va Sirdaryo — 68% viloyatlarida qayd etildi.
2022-yil yanvar oyiga nisbatan uy-joy oldi-sotdi shartnomlarining soni 2,7%ga oshdi.
Markaziy bank prognoziga ko‘ra, ipoteka kreditlashning yuqori stavkalari 2023-yilda O‘zbekistonda ko‘chmas mulk bozori o‘sishining asosiy omili bo‘ladi.
2022-yil yakunlariga ko‘ra, banklar tomonidan aholiga berilgan ipoteka kreditlari hajmi 1,5 baravarga — 9,8 trln. so‘mdan 14,4 trln. so‘mga oshdi.
Shu bilan birga, birlamchi va ikkilamchi bozorlarning o‘sishi ham 1,5 baravar — 7,4 trln so‘mdan 10,8 trln so‘mga va mos ravishda 2,4 trln so‘mdan 3,6 trln so‘mga yetdi.
Toshkentda uy-joy ijarasi narxlarining o‘zgarishi
Yanvar oyida poytaxtda ijaraning o‘rtacha narxi deyarli o‘zgarmadi va 2022-yil dekabr oyida 1,4%ga biroz pasaygan holda 1 kv.m. uchun $10,1ni tashkil etdi.
Ijaraning eng yuqori narxlari poytaxtning Shayxontohur ($15,7), Yakkasaroy ($11,8) va Mirobod ($12,2) tumanlarida qayd etildi.
Ijaraning nisbatan past narxlari Uchtepa ($8), Sergeli ($6,9) va Bektemir ($6) tumanlarida qayd etildi.
Shu bilan birga, 2022-yilning mos davriga kelib, Toshkent shahrida ijaraning o‘rtacha narxi deyarli 25%ga oshdi.
O‘tgan yilning yanvar oyidan buyon uy-joylarni ijaraga berish bo‘yicha eng yuqori o‘sish sur’atlari Shayxontohur (56,7%), Sergeli (29,9%) va Chilonzor (25,8%) tumanlarida qayd etilgan.
Ikkilamchi ko‘chmas mulk bozori
Hisob-kitoblarga ko‘ra, respublikada yanvar oyida ikkilamchi uy-joy bozorida 1 kv.m. uchun uy-joy narxining o‘rtacha o‘sishi oyiga 0,9%ni tashkil etgan bo‘lsa, 2022-yil yanvar oyidan buyon 20,2%ga o‘sdi.
Yil boshidan buyon Navoiy — 29,3% va Farg‘ona — 29% viloyatlarida va Toshkent — 28,3% shahrida uy-joy narxining sezilarli o‘sishi kuzatildi.
Toshkent shahridagi ikkilamchi bozorda yanvar oyida narxlarning o‘sishi oyiga 1,9%ni tashkil etdi.
Eng yuqori o‘sish sur’atlari Yunusobod — 2,9%, Olmazor — 2,8% va Shayxontohur tumanlarida — 2,7% qayd etildi.
2022-yil yanvar oyidan boshlab Toshkent shahrida ikkilamchi uy-joylarning o‘rtacha narxi 28,3%ga oshdi.
Avvalroq Iqtisodiy tadqiqotlar va islohotlar markazi yanvar oyidagi avtomobil bozori holatini tahlil qilgandi.
