Dekabr oyida iste’molchi narxlari indeksi 1,04%ga ko‘tarildi. Bu haqda Statistika agentligi ma’lum qildi.
Ko‘rsatkich so‘nggi bir necha yil ichida yilning oxirgi oyi uchun eng past darajaga yetdi. Taqqoslash uchun — 2023-yil dekabrida narxlar bir oy ichida 1,24%ga, 2020-yilda esa 1,5%ga oshgan edi.
Yillik inflyatsiya 9,8%ni tashkil etdi. O‘tgan yilga nisbatan 1%ga ko‘tarilgan bo‘lsa-da, o‘sish sur’ati 12,2% bo‘lgan 2022-yilga qaraganda sezilarli darajada pasaygan.
Dekabr oyida oziq-ovqat mahsulotlari narxlari 1,8%ga ko‘tarildi va 2022-yil noyabr oyidan beri bir oylik masofada maksimal o‘sishni ko‘rsatdi. O‘tgan yanvar oyidan beri birinchi marta yillik oziq-ovqat inflyatsiyasi 2,4% (+0,4%) gacha ko‘tarildi.
O‘tgan oyda sabzavotlar birdaniga 8%ga, sut va yog‘-moy mahsulotlari 5%dan ziyod qimmatlashdi. Shu bilan birga, don va un (-0,7%), shuningdek, shirinliklar (-0,4%) narxlari biroz pasaydi. Meva (+0,8%), go‘sht (+0,7%) va ichimliklar (+0,3%) narxlarida biroz o‘sish kuzatildi.
Bodring 1,5 baravar qimmatlashdi, bulg‘or qalampiri esa deyarli shuncha qimmatlashdi. Shuningdek, pomidor (+22%), kartoshka (+6,3%) va karam (+6%) narxlari oshdi, shu bilan birga lavlagi va sabzi 4%dan ko‘proq, banan 13,5%ga arzonlashdi.
Yil boshidan buyon eng ko‘p kartoshka (+39,9%), sarimsoq (+19,6%), paxta yog‘i (+15,3%), kungaboqar yog‘i va qo‘y go‘shti (+14,6%) qimmatlashdi. O‘tgan dekabr oyiga kelib, baqlajon deyarli 2 baravar, limon — uchdan bir qismdan ko‘proq, pomidor — deyarli 30%ga, tuxum — 7,3 foizga, guruch — 6,3 foizga arzonlashdi.
Sanoat mahsulotlari segmentida inflyatsiya dekabr oyida 0,4%gacha (-0,6%), yil oxirida esa 7,7%gacha pasaydi. Bir oyda kiyim-kechak, poyabzal va mebel 0,7%ga (bir yilda — mos ravishda 5,1%, 4,8% va 5,2%), maishiy texnika 0,5%ga (bir yilda 5,3%), dori-darmon 0,9%ga (bir yilda 26%) qimmatlashdi. Dekabr oyida elektronika narxlari 0,3%ga, yil davomida esa 1,5%ga oshdi.
Benzin dekabr oyida 0,7%ga arzonlashdi, yillik o‘sish esa 5,9%ni tashkil etdi. Metan oyiga 0,2% va yillik masofada 21%ga oshdi.
Pullik xizmatlar narxlarining oylik o‘sish sur’ati nisbatan barqaror bo‘lib, 0,7%ni tashkil etdi. Dekabr oyida yillik o‘sish 26,7%gacha pasaydi, lekin bahorgi energiya tariflarining oshishi tufayli bu ko‘rsatkich o‘tgan yilgi darajadan sezilarli darajada yuqoriligicha qolmoqda.
Umumiy ovqatlanish narxlari bir oyda 0,7%ga, mehmonxonalarda 0,2%ga oshdi, yillik o‘sish esa 11,7%ni tashkil etdi. Dekabr oyida uy-joy ijarasi 1,3%ga, 2024-yil boshidan esa 12,8%ga qimmatlashdi. Poyezd chiptalari 0,2% (12,6%), aviachiptalar esa 0,3% (1,2%)ga qimmatlashdi.
