Toshkentdagi Buyuk ipak yo‘li (Maksim Gorkiy) metro bekati yaqinida ikki qavatli yo‘l o‘tkazgich quriladi. Bu haqda 4-aprel kuni poytaxt hokimligi yo‘l infratuzilmasini modernizatsiya qilish loyihasi taqdimoti doirasida ma’lum qildi, deya xabar berdi Spot muxbiri.
Loyiha Mustaqillik shohko‘chasi, Mirzo Ulug‘bek va Buyuk Ipak yo‘li ko‘chalari kesishmasini qamrab oladi. Hokimlikning ta’kidlashicha, bu shaharning eng gavjum transport tugunlaridan biri bo‘lib, hozirda “tor bo‘g‘inlari"dan biri hisoblanadi.
Loyiha amalga oshirilgandan so‘ng, bu hududning o‘tkazuvchanlik qobiliyati taxminan 21% ga oshib, kuniga 98,8 ming avtomobildan 120 mingtagachani tashkil etadi.
O‘rtacha harakatlanish tezligi 25% ga — 21 dan 26 km/soatgacha oshadi, tig‘iz vaqtlarda harakatlanish vaqti esa taxminan chorak qismga qisqaradi. Ushbu yo‘nalishda avtobuslar tezligini 23 km/soatgacha oshirish rejalashtirilgan.
Loyiha BRT tizimi bilan ham integratsiya qilinmoqda: avtobuslar ajratilgan yo‘laklar bo‘ylab harakatlanadi va metro bekati yaqinidagi qulay o‘tish joylari orqali boshqa transport turlari bilan kesishadi.
Hokimlikda ta’kidlanishicha, zamonaviy texnologiyalarni qo‘llash tufayli qurilish ishlarining faol bosqichi taxminan 50−60 kun davom etishi mumkin.
Loyiha doirasida daraxtlarni ko‘chirib o‘tkazish rejalashtirilgan — ular tegishli ekspertizadan o‘tkazilgandan so‘ng Milliy dendrologiya bog‘iga ko‘chiriladi. Qurilish qiymati hozircha aniqlashtirilmoqda va ekspertiza yakunlangandan so‘ng e’lon qilinadi.
Rasmiylarning qayd etishicha, loyiha shaharning avtomobil modelidan jamoat transporti ustuvorligiga o‘tishning kengroq strategiyasining bir qismidir.
Avvalroq Spot Toshkentdan Nurafshongacha tezyurar BRT avtobus yo‘nalishi ochilishi haqida yozgan edi. Uzunligi 19 km bo‘lgan va 9 ta bekatni o‘z ichiga olgan ushbu yo‘nalishni 2028-yil oxirigacha qurib, foydalanishga topshirish rejalashtirilmoqda. Loyiha qiymati qariyb $120 mlnga baholangan.
