Google o‘zining Gemini ilovasiga reklamalarni integratsiya qilish imkoniyatini istisno etmayapti, deb yozadi Business Insider. Ayni paytda chat-botda umuman reklama mavjud emas.
Kompaniya tijorat direktori Filipp Shindlerning aytishicha, hozirda korporatsiya qidiruvning muloqot versiyasi bo‘lgan AI Mode (“AI rejimi”) da monetizatsiyani rivojlantirishga e’tibor qaratmoqda.
Biroq, bu rejimdagi muvaffaqiyatli reklama formatlari kelajakda alohida Gemini ilovasiga ko‘chirilishi mumkin.
Yanvar oyida Google’ning global reklama bo‘yicha vitse-prezidenti chat-botga e’lonlar qo‘shish rejasi yo‘qligini ta’kidlagan edi.
Endi esa Shindler reklama tarixan mahsulotlarni milliardlab auditoriyaga yetkazishda hal qiluvchi rol o‘ynaganini ta’kidladi.
Uning so‘zlariga ko‘ra, sifatli integratsiyalar haqiqiy tijorat qiymatiga ega bo‘lishi mumkin, ammo kompaniya ularni joriy etishga shoshilishni rejalashtirmayapti.
Hozircha Google klassik qidiruv va YouTubedan yuqori daromad tufayli chat-bot monetizatsiyasini tezlashtirmasligi mumkin.
Buning o‘rniga korporatsiya sun’iy intellektning premium funksiyalari, suratlarni saqlash uchun qo‘shimcha joy va Fitbit Premium kabi xizmatlarni o‘z ichiga olgan obunalarni targ‘ib qilmoqda. Google’ning umumiy pullik obunachilar bazasi allaqachon 350 mlnga yetgan.
Avvalroq Spot Rossiyada ChatGPT, Gemini va Claude’dan foydalanish cheklanishi mumkinligi haqida yozgandi.
2027-yil 1-sentabrdan kuchga kirishi rejalashtirilgan qonunda ulardan foydalanishga qaysi hollarda cheklovlar kiritilishiga hozircha aniqlik kiritilmagan.
