Yagona interaktiv davlat xizmatlari portalida yer osti suvlarini hisobga olish priborlarini o‘rnatish uchun arizalar qabul qilish boshlandi. Bu haqda platforma matbuot xizmati xabar berdi.
Xizmat “Geologiya” bo‘limida joylashgan. Uning yordamida fuqarolar va tashkilotlar yer osti suvlarini olish uchun quduqqa o‘rnatish maqsadida sotib olingan hisoblagichni ro‘yxatdan o‘tkazishlari va plombalashlari mumkin bo‘ladi.
Arizalar 24 soat davomida qabul qilinadi. So‘rovnomada suv inshooti manzili, quduqlar, quduqlar va hisoblagichlar soni, shuningdek, har bir hisoblagichning zavod raqami, rusumi va modeli hamda asbobga berilgan muvofiqlik sertifikati to‘g‘risidagi ma’lumotlar ko‘rsatilishi talab etiladi.
Xizmat narxi BHMning 50%ini (206 ming so‘m) tashkil etadi. Yagona portalga ariza berishda yig‘im chegirmani hisobga olgan holda BHMning 45%iga (185 400 so‘m) teng bo‘ladi.
Mahalliy gidrogeologik stansiya hisoblagichni tizimda ro‘yxatdan o‘tkazadi. Shundan so‘ng soliq inspeksiyasining mas’ul xodimi (inspektori) 10 ish kuni ichida hisoblagichning ishlashini tekshirish uchun joyiga chiqadi va uni plombalaydi.
Ariza beruvchi Yagona portaldagi shaxsiy kabinetida plombalash to‘g‘risidagi dalolatnomaning elektron nusxasini oladi.
Vazirlar Mahkamasi 2025-yil sentabr oyida yer osti quduqlarida suv hisoblagichlarini ro‘yxatdan o‘tkazish xizmati reglamentini tasdiqladi.
Hujjatga ko‘ra, hisoblagichlarni ro‘yxatdan o‘tkazish uchun Geologiya va konchilik vazirligi huzuridagi “O‘zbekgidrogeologiya” tashkiloti mas’ul etib belgilandi.
Quduqlarda hisoblagichlarni o‘rnatish 30-noyabrdan boshlab majburiy bo‘ldi. Artezian suvlaridan hisoblagichsiz foydalanish uchun quduqlar va boshqa inshootlardan foydalanish taqiqlanadi, jismoniy shaxslar tomonidan shaxsiy va xo‘jalik maqsadlari uchun sutkasiga 5 kub metrgacha suv olish bundan mustasno.
Avvalroq Spot Yagona portalda xorijdan kelgan kuryerlik jo‘natmalarini tasdiqlash mumkin bo‘lishi haqida yozgandi.
