Davr Bank aksiyadorlari aksiyalarning nazorat paketini Ozarbayjon Xalqaro bankiga (ABB) sotish bo‘yicha muzokaralarni ma’qulladi, deya xabar berdi Yagona korporativ axborot portali.
8-iyun kuni Davr Bank aksiyadorlarining yillik umumiy yig‘ilishi bo‘lib o‘tdi, unda 13 ta masala, jumladan, bank ulushini xalqaro investorga sotish imkoniyati ko‘rib chiqildi.
Aksiyadorlar Davr Bank ustav kapitalining 51%ini sotish imkoniyati bo‘yicha Ozarbayjon Xalqaro banki bilan muzokaralarni davom ettirish, shuningdek, bitimning asosiy shartlarini kelishish va zarur korporativ, huquqiy, moliyaviy va tartibga solish tartib-taomillarini amalga oshirishni bir ovozdan ma’qulladilar.
Bundan tashqari, tomonlar kelgusidagi kelishuvlarga muvofiq ABBga bank aksiyalarining qo‘shimcha 23% paketini sotib olish huquqini nazarda tutuvchi opsion mexanizmini muhokama qilish niyatida.
Shuningdek, yig‘ilishda Davr Bank boshqaruvi raisi Abdumajid Samadovning vakolatlarini yana bir yilga uzaytirish to‘g‘risida qaror qabul qilindi.
Taqdim etilgan ma’lumotlarga ko‘ra, Davr Bankning 2025-yil yakunlari bo‘yicha sof foydasi 667,3 mlrd so‘mni tashkil etgan. Aksiyadorlar qaroriga muvofiq, foydaning 5%i umumiy zaxira fondiga yo‘naltiriladi, qolgan qismi esa bankning taqsimlanmagan foydasi tarkibida qoladi.
Kuzatuv kengashining yangi tarkibiga quyidagilar kirdi:
- Lutfulla Ubayev;
- Mirqodir Mirzayatov;
- Ozoda Abdurahmonova;
- Shavkat G‘iyosov;
- Adham Alimov.
May oyida davlatga tegishli Ozarbayjon xalqaro banki yilning ikkinchi yarmida O‘zbekistonning Davr Bankini sotib olish va O‘zbekiston bozorida ish boshlashni rejalashtirayotgani ma’lum bo‘ldi.
1-may holatiga ko‘ra, Davr Bank aktivlari hajmi bo‘yicha 20-o‘rinni egallab turibdi — 12,75 trln so‘m. Xususiy bankning kredit portfeli 9,24 trln so‘mni, depozit portfeli esa 4,78 trln so‘mni tashkil etadi.
KTYDR ma’lumotlariga ko‘ra, Davr-bank xususiy aksiyadorlik tijorat banki 2001-yil 29-sentabrda davlat ro‘yxatidan o‘tgan bo‘lib, ustav fondi 500 mlrd so‘mni tashkil etadi. Bankning eng yirik ulushi — 46,9% Ubayev Lutfulla Xayrullayevichga tegishli. Shuningdek, Ubayeva Maxfuza Abdumalikovna 13,5%, Raxmatullayeva Durdona Lutfullayevna 9,9% hamda Mirzayatov Mirkodir Mirsagatovich 9,8% ulushga egalik qiladi.
Avvalroq Spot Fitch Ratings xalqaro reyting agentligi Aloqabank’ni xususiylashtirish bekor qilinishi mumkinligini taxmin qilgani haqida yozgandi.
