Sony Interactive Entertainment 2028-yildan boshlab PlayStation konsollari uchun chiqariladigan barcha yangi o‘yinlarning diskli nusxalarini ishlab chiqarishni to‘xtatishini ma’lum qildi.
Shundan so‘ng yangi o‘yinlar faqat raqamli formatda, ya’ni PlayStation Store va chakana savdo hamkorlari orqali tarqatiladi.
Kompaniya bu qaror foydalanuvchilarning xohish-istaklari o‘zgargani va ko‘ngilochar industriya tobora raqamli tarqatish tizimiga o‘tayotgani bilan bog‘liqligini izohladi.
Sony ma’lumotlariga ko‘ra, o‘yinchilarning aksariyati allaqachon o‘yinlarning raqamli versiyalarini tanlamoqda, diskli nusxalarga bo‘lgan talab esa izchil kamayib bormoqda.
Mazkur o‘zgarishlar faqat 2028-yil yanvaridan boshlab chiqadigan yangi o‘yinlarga taalluqli bo‘ladi. Ungacha chiqarilgan yoki shu sanagacha disk formatida chiqarilishi rejalashtirilgan o‘yinlar diskli ko‘rinishda sotilishda davom etadi.
Ta’kidlanishicha, yangi o‘yinlarning diskli nusxalarini ishlab chiqarishni to‘xtatish kompaniyaga raqamli ekotizimni rivojlantirish va o‘yinlarni tarqatishning yangi usullariga ko‘proq e’tibor qaratish imkonini beradi.
Shu bilan birga, foydalanuvchilar o‘yinlarning raqamli versiyalarini ham PlayStation Store, ham raqamli kalitlarni sotuvchi chakana savdo hamkorlari orqali xarid qilishlari mumkin bo‘ladi.
Shuningdek, kompaniya o‘yin xizmatlarini rivojlantirishni davom ettirishi va foydalanuvchilar yangi o‘yinlardan o‘zlari uchun eng qulay usulda foydalanishlari uchun ishlashini ma’lum qildi.
Sony o‘yinchilarga qo‘llab-quvvatlagani uchun minnatdorlik bildirib, PlayStation o‘yin ekotizimini rivojlantirishga sodiq qolishini ta’kidladi.
Avvalroq Spot Honda va Sony elektromobil ishlab chiqish bo‘yicha qo‘shma loyihani yopgani haqida yozgandi.
Afeela elektromobillarining birinchi va ikkinchi avlodlarini ishlab chiqarish zudlik bilan to‘xtatiladi. Buyurtma bergan barchaning pullari qaytarib beriladi.
