So‘nggi yillarda O‘zbekiston chakana savdo bozori jadal rivojlanish bosqichini boshdan kechirmoqda: mamlakatda xalqaro brendlar ulushi ortib bormoqda. Shunga qaramay, iste’molchilar orasida xalqaro internet-do‘konlar orqali onlayn xarid qilish trendi hamon yuqoriligicha qolmoqda.
Global platformalardagi mahsulotlarni mamlakatimizga yetkazib berishni bugun xalqaro kuryerlik kompaniyalari muvaffaqiyatli yo‘lga qo‘ygan. AQSH, Turkiya va Xitoy kabi an’anaviy yo‘nalishlar bilan bir qatorda, Rossiya, Janubiy Koreya, Malayziya va Yevropa Ittifoqi mamlakatlaridan ham yetkazib berish zanjiri sezilarli darajada kengaydi.
Quyida xorijiy do‘konlardan xaridlarni O‘zbekistonga yetkazib beruvchi 7 ta asosiy logistika operatorining amaldagi tariflari, yetkazib berish shartlari va qo‘shimcha imkoniyatlari bilan tanishishingiz mumkin.
Globbing Uzbekistan
Nimalarni yetkazib beradi: xarid qilingan tovarlarni.
Qayerdan: AQSh, Xitoy, Angliya, Germaniya, Italiya va Ispaniya.
1 kg yukni yetkazib berish narxi: $12 dan boshlanadi.
Globbing Uzbekistan — AQSh, Xitoy, Angliya, Germaniya, Italiya va Ispaniyada o‘z omborlariga ega bo‘lib, xarid qilingan tovarlarni O‘zbekistonga yetkazib beradi.
Toshkent shahri bo‘ylab yetkazib berish narxi $2, O‘zbekistonning boshqa hududlariga esa $5 etib belgilangan. Kompaniya, shuningdek, “Mening o‘rnimga xarid qil” xizmatini ham taklif etadi. Ushbu xizmat uchun mahsulot qiymatining 5%i miqdorida komissiya undiriladi, biroq minimal to‘lov $5 ni tashkil etadi.
Maxsus internet-do‘konlardan xarid qilinganda, agar do‘kon kompaniya omborigacha bepul yetkazib berishni taqdim etmasa, qo‘shimcha 5% komissiya hisoblanadi.
Bundan tashqari, kompaniya mijozlarga bir qator qo‘shimcha xizmatlarni ham taklif etadi. Xususan, jo‘natmalarni konsolidatsiya qilish xizmati $2, posilkaning tashqi fotosuratini taqdim etish $2, ichki tarkibini suratga olish esa $5 etib belgilangan. Qo‘shimcha qadoqlash xizmati $5 turadi.
Agar tovar belgilangan muddatda omborxonadan olib ketilmasa, saqlangan har bir kun uchun $3 miqdorida to‘lov undiriladi.
Boxette
Nimalarni yetkazib beradi: xorijiy internet-do‘konlardan xarid qilingan tovarlarni.
Qayerdan: AQSH, Turkiya.
1 kg yukni yetkazib berish narxi: $11.
Boxette Uzbekistan — AQSH va Turkiyadan O‘zbekistonga tovarlarni yetkazib berishga ixtisoslashgan xalqaro logistika kompaniyasi. Bozorda 10 yildan ortiq faoliyat yuritayotgan kompaniya mijozlarini xorijiy internet-do‘konlardagi chegirmalar haqida muntazam xabardor qilib boradi hamda turli bonus va aksiyalarni taklif etadi.
Kompaniya ekspress va tejamkor tariflar bo‘yicha xizmat ko‘rsatadi. Ekspress tarifda yetkazib berish muddati 3−9 ish kunini, tejamkor tarifda esa 9−16 ish kunini tashkil etadi. Minimal jo‘natma og‘irligi ekspress tarif uchun 100 gramm, tejamkor tarif uchun esa 1 kgdan boshlanadi.
Toshkent shahri bo‘ylab yetkazib berish narxi jo‘natma og‘irligiga qarab $3,3 dan $6,7 gacha, O‘zbekistonning boshqa hududlariga yetkazib berish esa $5,4 dan $10 gacha belgilangan.
Kompaniya mijozlarga bir qator qo‘shimcha xizmatlarni ham taklif etadi. Jumladan, “Siz uchun sotib olamiz” xizmati xarid summasining 10%i miqdorida, biroq kamida $5 evaziga ko‘rsatiladi.
Shuningdek, AQSHdan ekspress yetkazib berish xizmati 1 kg uchun taxminan $13,3, tejamkor tarif esa $10,8 ni tashkil etadi. Turkiyadan tejamkor tarif bo‘yicha yetkazib berish narxi ham 1 kg uchun $10,8 etib belgilangan.
Green Post
Nimalarni yetkazib beradi: xarid qilingan tovarlarni.
Qayerdan: Xitoy.
1 kg yukni yetkazib berish narxi: $5,5 dan boshlanadi.
Green Post xorijdan yuk va posilka buyurtma qiluvchi jismoniy shaxslar, shuningdek, tijorat maqsadida mahsulot olib keluvchi tadbirkorlar uchun bir nechta yetkazib berish tariflarini taklif etadi. Kompaniya yukning turi va hajmiga qarab havo hamda yer usti transporti orqali turli logistika yechimlarini taqdim etadi.
Mijozlar quyidagi tariflardan birini tanlashi mumkin:
- Avia Pochta (oddiy) — yetkazib berish muddati 3−7 kun. Narxi 1 kg uchun $9,5. Yuklar seshanba va juma kunlari jo‘natiladi. Tarif faqat oddiy tovarlar uchun mo‘ljallangan.
- Avia TK Pochta va Avia SG Pochta — yetkazib berish muddati 5−10 kun. Narxi 1 kg uchun $13. Yuklar payshanba kunlari jo‘natiladi.
- Avto Pochta va Cargo Commerce (tijorat yuklari) — yetkazib berish muddati 20−30 kun. Avto Pochta tarifi 1 kg uchun $5,5, Cargo Commerce esa 1 kg uchun $8 dan boshlanadi. Har ikki xizmat bo‘yicha yuklar shanba kunlari jo‘natiladi. Avto Pochta orqali barcha turdagi tovarlar, jumladan, batareyali qurilmalar, suyuqliklar va kukunli mahsulotlar qabul qilinadi. Cargo Commerce esa oddiy tijorat yuklari uchun mo‘ljallangan bo‘lib, agar yuk tarkibida batareya, suyuqlik yoki kukun bo‘lsa, har bir kilogramm uchun qo‘shimcha $2 haq undiriladi.
- Cargo Container — yetkazib berish muddati 20−30 kun. Narxi kub metri uchun $100 dan boshlanadi. Xizmat og‘irligi 100 kgdan ortiq bo‘lgan bir turdagi tijorat yuklarini tashish uchun mo‘ljallangan.
Bundan tashqari, Green Post mijozlarga bir qator qo‘shimcha ombor xizmatlarini ham taklif etadi. Jumladan, qadoqlash xizmati 1 kg uchun $0,4, tovarlarni konsolidatsiya qilish 1 kg uchun $0,2, standart tovar tekshiruvi 1 kg uchun $0,5 etib belgilangan.
Batafsil tekshirish va foto hisobot xizmati uchun esa har bir lotga $1 to‘lanadi.
Jana Post
Nimalarni yetkazib beradi: Pinduoduo, Taobao va 1688 ilovasi orqali xarid qilingan tovarlarni.
Qayerdan: Xitoy.
100 gramm yukni yetkazib berish narxi: $0,61.
Jana Post — Xitoydan tovarlarni yetkazib berish bo‘yicha kuryerlik xizmatlarini ko‘rsatadigan Qozog‘iston kompaniyasi. 2024-yildan boshlab O‘zbekistonda ham faoliyat ko‘rsata boshlagan.
Standart kuryerlik va pochta xizmatlaridan tashqari, kompaniya Xitoy bozorlari bilan ishlash bo‘yicha treninglar ham o‘tkazadi. Kompaniya O‘zbekistonda ko‘plab tarqatish punktlariga ega bo‘lib, ulardan beshtasi Toshkentda joylashgan. Jumladan, kompaniya Pinduoduo, Temu, 1688 va Taobao kabi yirik onlayn platformalarining rasmiy hamkori hisoblanadi.
Kompaniya barcha turdagi posilkalar uchun soddalashtirilgan tarif tizimidan foydalanadi. Unga ko‘ra, barcha buyurtmalar uchun yagona narx amal qiladi — har 100 gramm yuk uchun $0,61.
Bunda posilkaning vazni keyingi 100 grammgacha yaxlitlanadi. Masalan:
- 85 grammli buyurtma — 100 gramm sifatida;
- 158 grammli buyurtma — 200 gramm sifatida;
- 244 grammli buyurtma — 300 gramm sifatida hisoblanadi.
Yetkazib berish narxi ham aynan shu yaxlitlangan vazn asosida belgilanadi.
Meest Shopping
Nimalarni yetkazib beradi: xarid qilingan tovarlarni.
Qayerdan: AQSH, Polsha, Germaniya, Ispaniya, Fransiya, Chexiya, Angliya, Italiya, Portugaliya, Gretsiya, Ukraina.
1kg yukni yetkazib berish narxi: AQShdan $9,5, Kanadadan $8,9, Polshadan €9,5, Angliyadan £9,5, Gretsiya, Germaniya, Italiya, Fransiya, Portugaliya, Ispaniya hamda Chexiyadan €8, Ukrainadan esa €7,7.
Meest Shopping Yevropa, Turkiya va AQShning onlayn-do‘konlaridan O‘zbekistonga xaridlarni yetkazib berish bo‘yicha xizmatlarini taqdim etadi. Mijozlar ro‘yxatdan o‘tgandan so‘ng tovarga buyurtma berish uchun xorijiy omborlarning ID-raqami va manzillarini olishadi. Kompaniya xarid qilish, yetkazib berishda mijozga yordam beradi, shuningdek, mashhur do‘konlarning chegirmalari va sotuvlari haqida ma’lumot beradi.
Kompaniya qo‘shimcha xizmatlarni ham taklif etadi. Ularning turi va narxlari jo‘natma yuboriladigan davlatga qarab farq qiladi.
Turon Express
Nimalarni yetkazib beradi: xarid qilingan tovarlarni.
Qayerdan: AQSh.
1kg yukni yetkazib berish narxi: $10.
Turon Express — 2017-yildan beri AQShdan O‘zbekistonga posilkalarni yetkazib beradi. Kompaniya buyurtmani rasmiylashtirish uchun AQShdagi shaxsiy manzilni taqdim etadi, shuningdek, xaridorlar uchun sotib olishda yordam xizmatlarini taklif qiladi.
Kompaniyada jo‘natmalarni havo yoki yer usti transporti orqali tashish uchun soddalashtirilgan tarif tizimi amal qiladi. Asosiy tarif har 1 kg jo‘natma vazni uchun $10 ni tashkil etadi. Posilkalar 100 grammdan boshlab qabul qilinadi va minimal 1 kg og‘irlik talabi mavjud emas. Jo‘natmalarni qabul qilish hamda bir nechta posilkani bitta jo‘natmaga birlashtirish xizmati esa bepul taqdim etiladi.
Toshkent shahri bo‘ylab yetkazib berish xizmati 1 kg gacha bo‘lgan jo‘natmalar uchun $3 ni tashkil etadi. Respublikaning boshqa hududlariga yetkazib berish narxi esa 3 kg gacha bo‘lgan yuklar uchun $3 etib belgilangan.
Yumecs
Nimalarni yetkazib beradi: xarid qilingan tovarlarni.
Qayerdan: Rossiya, Turkiya, Xitoy, Koreya, Dubay, AQSh va Malayziya.
1kg yukni yetkazib berish narxi: Dubaydan $9, Rossiyadan $4,4−20, Turkiyadan $10−18, Xitoydan $8,5−10 Koreyadan $10, Malayziyadan $10.
Yumecs — xalqaro internet-xaridlar va posilkalarni yetkazib berish xizmati bo‘lib, Rossiya, Turkiya, AQSh, Janubiy Koreya, Malayziya va Xitoydan O‘zbekistonga internet-buyurtmalar hamda posilkalarni xavfsiz va ishonchli yetkazib beradi. Kompaniya amaldagi qonunchilikda taqiqlanmagan deyarli barcha turdagi mahsulotlarni qabul qiladi.
Havo transporti orqali yuboriladigan posilkalar xalqaro aviatsiya standartlariga mos bo‘lishi lozim. Ayrim yirik o‘lchamli yuklar uchun uzunlik va gabarit cheklovlari kompaniya tomonidan alohida belgilanadi.
Bitta posilkada bir xil turdagi mahsulotdan 3 donadan ortiq bo‘lsa, u shaxsiy foydalanish uchun emas, balki tijorat yuki sifatida baholanadi. Bunday jo‘natmalar 1 kg uchun $12 dan boshlanadigan maxsus tariflar asosida rasmiylashtirilib, hisoblanadi.
Muayyan toifadagi tovarlar hamda qo‘shimcha xizmatlar uchun alohida to‘lovlar amal qiladi. Xususan, dori-darmonlarni rasmiylashtirish uchun $3, atir va parfyumeriya mahsulotlari uchun $9,99, akkumulyatorli va simsiz ishlaydigan qurilmalar uchun esa $20 miqdorida qo‘shimcha haq olinadi. Shuningdek, ekspress bojxona rasmiylashtiruvi $10, omborda tovarni tekshirish xizmati $5, posilkaning foto-hisobotini taqdim etish esa $1 etib belgilangan.
Kompaniya posilkalarni omborda 14 kungacha bepul saqlaydi. Ushbu muddatdan keyin esa omborda saqlangan har bir kun uchun $1 miqdorida to‘lov undiriladi.
Agar posilkaning umumiy og‘irligi 30 kgdan oshsa, mijoz uni kompaniyaning Toshkentdagi bosh ofisidan mustaqil ravishda olib ketishi kerak. Buyurtma manzilga yetkazilishidan avval kuryer qabul qiluvchi bilan telefon orqali bog‘lanadi. Agar mijoz bilan aloqa o‘rnatishning imkoni bo‘lmasa, yetkazib berish muddati avtomatik ravishda 1−2 kunga uzaytiriladi.
