Ilon Mask 24/7 ishlaydigan raqamli xodimlarni ishga tushirdi. Bu haqda The Verge nashri xabar berdi.
Qayd etilishicha, SpaceXAI yangi Grok Bot xizmatini taqdim etdi. U oddiy chatbotdan farqli ravishda foydalanuvchining topshirig‘ini olib, uni mustaqil ravishda bajarishga harakat qiladigan “SI xodim” yoki SI-agent sifatida ishlaydi.
Agentlar foydalanuvchi ishlatadigan dastur, sayt va boshqa vositalarga kirib, topshiriqlarni inson kabi bajarishi mumkin.
Unga topshiriq berilganda, Grok Bot saytlar va turli ilovalar bilan ishlashi, CRM tizimlaridan foydalanishi, kod yozib tahrirlashi, dasturiy xatolarni aniqlab tuzatishi hamda bir nechta bosqichdan iborat vazifalarni mustaqil bajarishi mumkin.
Ya’ni foydalanuvchi har bir qadamni alohida ko‘rsatib turishi shart emas. Agent ishni bajaradi va faqat insonning tasdig‘i yoki qo‘shimcha ma’lumoti kerak bo‘lganda murojaat qiladi.
Grok Bot’ning asosiy g‘oyasi — SI’ni oddiy yordamchidan doimiy ishlaydigan raqamli xodimga aylantirish. Agentlar bulutdagi umumiy muhitda ishlaydi va topshiriqlarni foydalanuvchi kompyuterida doimiy ravishda ochiq turishiga ehtiyoj sezmasdan bajarishi mumkin. Shu sababli ularni kecha-kunduz ishlaydigan “xodimlar” sifatida tasavvur qilish mumkin.
Yana bir qiziq jihati — bir nechta SI-agent bir-biri bilan hamkorlik qilishi mumkin. Ular topshiriqlarni o‘zaro taqsimlab, bir-biriga xabar yuborishi va umumiy ish jarayonini davom ettirishi mumkin.
Ta’kidlanishicha, Grok Bot g‘oyasi noldan paydo bo‘lmagan. The Verge ma’lumotiga ko‘ra, uning dastlabki ichki versiyasi SpaceX’da savdo, marketing, operatsion ishlar va dasturiy ta’minotdagi xatolarni tuzatishda qo‘llangan. Keyinchalik ushbu tajriba kengroq xizmatga aylantirilgan.
Bu jihat muhim: gap faqat nazariy imkoniyat haqida emas, kompaniya ichida real ish jarayonlarida sinab ko‘rilgan AI-agentlar haqida ketmoqda.
Bu yo‘nalish SpaceXAI’ning boshqa mahsulotlarida ham rivojlanmoqda. Masalan, kompaniyaning Grok 4.5 modeli aynan kodlash, agentlik vazifalari va bilimga asoslangan ishlarni bajarishga yo‘naltirilgan.
Shuningdek, Grok Build kod yozish va dasturiy ta’minotdagi xatolarni tuzatishga mo‘ljallangan agent sifatida ishlab chiqilgan. Unda bir nechta agentni parallel ravishda ishga tushirish va ularning ishini kuzatish imkoniyati ham mavjud.
Grok Bot hozircha beta-versiyada. U dastlab ayrim pullik foydalanuvchilar uchun taqdim etilgan, korporativ foydalanuvchilar esa navbat ro‘yxatiga yozilishi mumkin.
Mask kompaniyasi SI’ni “savolga javob beradigan chatbot” darajasidan “topshiriqni o‘zi bajaradigan raqamli xodim” darajasiga olib chiqishga urinmoqda.
Bunday agentlar saytlar, CRM, kod muhiti va boshqa dasturlar bilan bevosita ishlay olishi hamda bir nechta agentning birgalikda ishlashi mumkinligidir.
Avvalroq Spot LG televizor va monitorlari SIni o‘qitish uchun suhbatlarni tinglashi va yozib olishi mumkinligi haqida yozgandi.
