O‘zbekistonda energiya resurslarini qazib olish bosqichma-bosqich faollashmoqda, biroq ko‘rsatkichlar avvalgi yillardagi darajadan pastligicha qolmoqda. Bu haqda Milliy statistika qo‘mitasining hisobotida ma’lum qilindi.
Joriy yilning to‘qqiz oyida mamlakat zavodlarida 913,2 ming tonna avtomobil benzini ishlab chiqarildi. Shundan 101,9 ming tonnasi sentabr oyiga to‘g‘ri keladi. 2025-yilning shu davriga nisbatan ishlab chiqarish hajmi 2,6% ga oshgan bo‘lsa, 2024-yilga nisbatan 8,5% ga kamaygan.
Neft qazib olish hajmi 482,2 ming tonnani tashkil etdi. Bu o‘tgan yilga nisbatan 1,6% ga, 2024-yilga nisbatan esa 11% ga kam. Yanvar-avgust oylarida bu ko‘rsatkichlar bo‘yicha pasayish mos ravishda 2,2% va 12,4% ni tashkil etgandi.
Gaz kondensati qazib olish hajmi 729,2 ming tonnani tashkil etib, o‘tgan yilning shu davriga nisbatan 14,1% ga kamaydi. Avgust oxirida pasayish 14,8% ni tashkil etgan edi. 2024-yilga nisbatan esa qazib olish 21% ga qisqargan. Avgust oxirida bu ko‘rsatkich 21,8% ni tashkil etgan.
Shu bilan birga, tabiiy gaz ishlab chiqarish 27 mlrd kub metrga kamaydi. Bu 2025-yilga nisbatan 16,4% ga, 2024-yilga nisbatan esa 19,9% ga kam. Yanvar-avgust oylarida pasayish mos ravishda 16,3% va 19,6% ni tashkil etgan.
Uch chorak yakunlariga ko‘ra, 5,4 mln tonna ko‘mir qazib olindi. Shundan 1 mln tonnasi sentabr oyida qazib olingan. Ko‘mir qazib olish o‘tgan yilga nisbatan 6,9% ga kamaygan, biroq 2024-yilga nisbatan biroz oshgan.
Sement va dizel yoqilg‘isi ishlab chiqarishda barqaror o‘sish kuzatilmoqda. Yanvar-sentabr oylarida portlandsement ishlab chiqarish 16,2% ni tashkil etdi. Bu 2025-yil darajasidan 3,1% ga, 2024-yil darajasidan esa 36,1% ga yuqori.
Dizel yoqilg‘isi ishlab chiqarish hajmi 979 ming tonnaga yetdi. Bu o‘tgan yilga nisbatan 11,7% ga, 2024-yilga nisbatan esa 22,8% ga ko‘p.
Avvalroq Spot Buxoro NQIZ AI-92 va AI-95 benzini ishlab chiqarishni oshirish uchun modernizatsiya qilinishi haqida yozgandi.
