“Mahalla budjeti” tizimini joriy etish orqali mahallalarning moliyaviy imkoniyatini yanada kengaytirish bo‘yicha qo‘shimcha chora-tadbirlar to‘g‘risida"gi prezident qarori qabul qilindi.
Qarorga ko‘ra, 2023-yildan soliqlarni undirish ko‘rsatkichi past bo‘lgan 14 ta tumanda “Mahalla budjeti” tizimi huquqiy eksperiment tariqasida joriy etiladi.
Mazkur tumanlarda mol-mulk va yer solig‘i (noturar joylar bo‘yicha mol-mulk va yer solig‘i bundan mustasno) bo‘yicha undirilgan mablag‘larning 10%i hisobot oyidan keyingi oyning 10-sanasigacha tuman budjetlari orqali tegishli jamg‘armalarga yo‘naltiriladi.
2023-yilning 1-martigacha mol-mulk va yer solig‘i bo‘yicha hisoblangan, to‘langan mablag‘lar va soliq qarzdorliklari to‘g‘risidagi ma’lumotlardan mahallalar real vaqt rejimida foydalanishi imkoniyati yaratiladi.
Keltirilishicha, “Mahalla budjeti” tizimi asosida shakllantirilgan mablag‘lar “Fuqarolarning o‘zini o‘zi boshqarish organlari to‘g‘risida"gi qonunda nazarda tutilgan fuqarolar yig‘ini kengashi tomonidan boshqariladi.
“Mahalla budjeti” tizimi joriy etiladigan va soliqlarni undirish ko‘rsatkichi past bo‘lgan tumanlar ro‘yxati:
| Tartib raqami | Hudud nomi | Tuman nomi |
| 1 | Qoraqalpog‘iston Respublikasi | Beruniy |
| 2 | Andijon viloyati | Andijon |
| 3 | Buxoro viloyati | Olot |
| 4 | Jizzax viloyati | Zomin |
| 5 | Qashqadaryo viloyati | Qarshi |
| 6 | Navoiy viloyati | Karmana |
| 7 | Namangan viloyati | Uychi |
| 8 | Samarqand viloyati | Urgut |
| 9 | Surxondaryo viloyati | Jarqo‘rg‘on |
| 10 | Sirdaryo viloyati | Sayxunobod |
| 11 | Toshkent viloyati | Bo‘ka |
| 12 | Farg‘ona viloyati | Bag‘dod |
| 13 | Xorazm viloyati | Bog‘ot |
| 14 | Toshkent shahri | Uchtepa |
Prezidentning Oliy Majlisga qilgan murojaatida mahalla o‘zining muammosini mustaqil hal etishi uchun “Mahalla budjeti” tizimini joriy etish haqida ilgari surilgandi.
