Germaniyada o‘tkaziladigan Yosh tadbirkorlar dasturiga (Westerwelle Young Founders Programme) arizalar qabul qilinmoqda.
Dastur 25 ta yosh yetakchi uchun 6 oylik stipendiya dasturi hisoblanib, ta’sischilarning tashabbuslarini kengaytirish va ularning yetakchilik qobiliyatlarini rivojlantirishga qaratilgan.
Unda ishtirok etish bepul bo‘lib, quyidagi uch bosqichdan iborat:
- Boshlanish konferensiyasi (Kick-Off Conference): ikki kunlik onlayn boshlang‘ich konferensiya joriy yilning 4−5-sentyabr kunlari o‘tkaziladi.
- Masofaviy dastur (Remote Programme): Sentabr-fevral (6 oy davom etadi) oylarida shaxsiy murabbiy, tengdoshlardan o‘rganish sessiyalari, ekspert seminarlari va investorlar bilan muloqot kabilar tashkil etiladi.
- Berlin konferensiyasi (Berlin Conference): Eng yaxshi 10 ta ishtirokchi 2024-yilning may oyida Berlinda o‘tkaziladigan 5 kunlik konferensiyaga taklif etiladi.
Ushbu konferensiya davomida ta’sischilar investorlar oldida chiqish qilish, seminarlarda ishtirok etish, tarmoq tadbirlariga qo‘shilish va boshqa imkoniyatlarga ega bo‘ladilar.
Dasturda ishtirok etishni xohlovchi tadbirkorlar rivojlanayotgan mamlakat fuqarosi yoki rezidenti bo‘lishi hamda so‘nggi 5 yil ichida tijorat kompaniyasini tashkil etgan bo‘lishi kerak.
Shu bilan birga, mazkur kompaniya daromadga chiqqan bo‘lishi yoki tashqi moliyalashtirishning birinchi bosqichidan o‘tib, kengaytiriladigan biznes modeliga ega bo‘lishi zarur.
Sanoat sifatini, ta’sirini yoki inklyuzivligini oshirishi mumkin bo‘lgan fazilatlarga ega loyihalar bo‘lishi kerak.
Nomzodlarning o‘zi esa ingliz tilini yaxshi bilishi va 6 oylik masofaviy dasturda ishtirok etish imkoniyatiga ega bo‘lishi talab etiladi.
Onlayn ariza jo‘natish jarayonida quyidagilarni jo‘natish zarur:
- startap haqida ma’lumotlar;
- asosiy moliyaviy ma’lumotlar (daromadlar, mablag‘lar);
- LinkedIn profili yoki CV.
Arizalarni joriy yilning 13-avgustigacha havola orqali jo‘natish mumkin. Faqat to‘liq jo‘natilgan arizalar ko‘rib chiqiladi.
Tanlangan nomzodlar bilan suhbat 16−29 avgust kunlari o‘tkaziladi va natijalar 31-avgustda e’lon qilinadi.
Batafsil ma’lumot bu yerda.
Avvalroq Yaponiya universiteti MEXT stipendiya dasturiga arizalar qabul qilinayotgani haqida xabar berilgandi.
