“WhatsApp” guruhlar uchun ovozli chatlarni joriy qildi, deya xabar bermoqda “TechCrunch” nashri.
Yangi funksiya 32 dan ortiq ishtirokchidan iborat guruhlarda ishlaydi, deb yozadi nashr.
Mazkur funksiya butun dunyo bo‘ylab yaqin haftalarda hamma foydalanuvchilar uchun mavjud bo‘ladi, dedi kompaniya.
Ovozli chatlar “Discord”, “Telegram” va “Slack"dagi shu kabi funksiyalarni eslatadi, deya qayd etadi nashr.
Ular har bir ishtirokchiga qo‘ng‘iroq qilmasdan muloqotni boshlash imkonini beradi. Guruh a’zolari suhbatga qalqib chiquvchi oyna orqali qo‘shilishlari mumkin.
“WhatsApp” eslatmalarida barcha ovozli chatlar oxirigacha shifrlash bilan himoyalangan. Qo‘ng‘iroq davomida ishtirokchilar messenjerda matnli xabarlar almashishni ham davom ettirishlari mumkin.
Avvalroq “WhatsApp” bloklanish tahdidi tufayli Rossiyada kanallarni ochishdan bosh tortgani haqida xabar berilgandi.
“The Moscow Times” nashri kompaniya qarorini yaqinda Rossiyada messenjerni blokirovka qilish tahdidlari bilan bog‘laydi.
Davlat dumasi deputati Anton Gorelkin va Davlat dumasining axborot siyosati qo‘mitasi raisi Aleksandr Xinshteyn antirossiya xarakteridagi rus tilidagi kanallarning ishga tushirilishi mamlakatda “WhatsApp"ning taqiqlanishiga olib kelishi mumkinligidan ogohlantirdi.
Agar ishga tushirilgandan so‘ng, kanallar orasida taqiqlangan ma’lumotlar paydo bo‘lsa, messenjer haqiqatan ham taqiqlanishi mumkin, deya ma’lum qildi “Roskomnadzor”.
Shu bilan birga, Federatsiya Kengashi Xitoy misolida Rossiya ilovasini ishlab chiqish haqida o‘ylashni taklif qildi.
“WhatsApp” 2023-yil 13-sentabrda 150 ta davlatda kanallar ishga tushirilishini e’lon qildi, biroq funksiya Rossiyada ishga tushirilmadi.
Avvalroq “Spot” “Whatsapp” HD sifatli suratlarni yuborish funksiyasini ishga tushirishi haqida yozgandi.
Yangilanish foydalanuvchilarga surat va tasvirlarni yuqori sifatda yuborish imkonini beradi.
