O‘zbekiston Afg‘onistonda Hayraton-Mozori-Sharif temir yo‘l liniyasida yangi yuk terminalini ochdi, deya xabar berdi O‘zbekiston temir yo‘llari matbuot xizmati.
21-may kuni davlat kompaniyasi delegatsiyasi Hayraton-Mozori-Sharif liniyasi qismida qurilish-tiklash ishlari yakunlangan quruq portning ochilish marosimida ishtirok etish uchun Mozori-Sharifga tashrif buyurdi.
Tadbir doirasida terminalga birinchi yuk poyezdi yetib keldi va shundan so‘ng yuk tushirish ishlari rasman boshlandi.
O‘TYning ta’kidlashicha, obyektning ishga tushirilishi uning to‘laqonli faoliyatini boshlab berdi va yo‘nalish bo‘ylab yuk tashish hajmini yanada oshirish uchun asos bo‘ldi.
O‘zbekiston temir yo‘llari boshqaruvi raisi Zufar Narzullayev Afg‘oniston bosh vazirining iqtisodiy masalalar bo‘yicha o‘rinbosari Mulla Abdul G‘ani Barodar bilan muzokaralar o‘tkazdi.
Tomonlar liniyaning o‘tkazuvchanlik qobiliyatini yanada oshirish, jumladan, Naibobod stansiyasida uzunligi 1650 metr bo‘lgan qo‘shimcha kirish yo‘lini qurish chora-tadbirlarini muhokama qildilar.
Loyiha yuk vagonlariga ishlov berish hajmini oshirish, ularning to‘xtab qolish vaqtini qisqartirish va temir yo‘l infratuzilmasi samaradorligini oshirish imkonini berishi kutilmoqda.
Afg‘oniston tomoni tashabbuslarni qo‘llab-quvvatlab, texnik va qurilish ishlarini tezkorlik bilan tashkil etishni topshirdi, shuningdek, kelayotgan yuklarni o‘z vaqtida qayta ishlashni ta’minlashga tayyorligini ma’lum qildi.
Hayraton-Mozori-Sharif tarmog‘i 2010-yilda qurilgan va ekspluatatsiya boshlanganidan beri Sogdiana Trans boshqaruvida bo‘lgan. 2024-yilda 75 km uzunlikdagi liniya, shuningdek, Naibobod stansiyasi rekonstruksiya qilindi.
Avvalroq Spot O‘zbekiston Afg‘onistondan yiliga 300 ming tonnagacha kartoshka import qilmoqchi ekanligi haqida yozgandi.
