Apple xotira chiplari va ma’lumot saqlash qurilmalari narxining keskin oshishi sababli ayrim qurilmalari narxini oshirishga majbur bo‘lishi mumkin. Bu haqda kompaniya bosh direktori Tim Kuk The Wall Street Journal nashriga bergan intervyusida ma’lum qildi.
Kukning so‘zlariga ko‘ra, muammo faqat alohida yetkazib beruvchilar bilan cheklanib qolmagan. Ishlab chiqaruvchilar tobora ko‘proq quvvatni server uskunalari va sun’iy intellekt infratuzilmasiga yo‘naltirmoqda.
Bu esa xotira taqchilligini kuchaytirmoqda va narxlarni oshirmoqda. O‘zgarishlar allaqachon elektronika ta’minot zanjirlariga ta’sir ko‘rsatdi.
Uning ta’kidlashicha, Apple xotira va to‘plagichlar ishlab chiqarish bo‘yicha o‘z zavodlarini qurmoqchi emas. Buning o‘rniga kompaniya zarur yetkazib berish hajmini mustahkamlash va uzilishlar xavfini kamaytirish uchun o‘z moliyaviy resurslaridan foydalanishga tayyor.
Apple hozircha qaysi qurilmalar qimmatlashishi mumkinligi va kompaniya narxlarni qachon qayta ko‘rib chiqishi haqida ma’lumot bermadi.
Kuk xotira va boshqa tarkibiy qismlarning narxi oshib borayotgani haqida ogohlantirish bilan cheklandi.
Komponentlar narxining oshishi Apple qurilmalarning keyingi to‘lqinini tayyorlayotgan davrga to‘g‘ri keladi.
Kutilayotgan yangiliklar orasida birinchi buklanadigan iPhone va yangilangan Pro modellari mavjud bo‘lib, sanoat manbalariga ko‘ra, kompaniya ularni yaqin kelajakda taqdim etishi mumkin.
Kukning qo‘shimcha qilishicha, Apple turli mamlakatlardan xotira yetkazib beruvchilarni ko‘rib chiqmoqda.
Biroq, ularning ba’zilari bilan hamkorlik milliy xavfsizlik bilan bog‘liq cheklovlar tufayli qo‘shimcha kelishuvlarni talab qilishi mumkin.
Avvalroq Spot Tim Kuk Apple bosh direktori lavozimini tark etishini e’lon qilgani haqida yozgandi.
Sentabr oyidan boshlab kompaniyaga apparat ta’minoti bo‘yicha katta vitse-prezident Jon Ternus rahbarlik qiladi.
