Toshkent jamoat transportida yo‘lkira tariflarini yangilash bo‘yicha Xalq deputatlari poytaxt Kengashining qarori loyihasi jamoatchilik muhokamasiga qo‘yildi.
Unga ko‘ra, 2026-yilning 1-oktabridan boshlab avtobus va metroda amalga oshiriladigan bir martalik elektron to‘lovni 2500 so‘m etib belgilash taklif etilmoqda. Hozirda bu 1700 so‘mni tashkil etadi.
Shu bilan birga, naqd puldagi to‘lovlar 3 ming so‘m, bir yo‘lovchining bagajini tashish xizmati uchun esa to‘lov 4 ming so‘m miqdorida o‘zgarishsiz qoladi. Barcha narxlar QQS bilan keltirilgan.
Loyihada transport kartalari uchun qatnovlar soniga qarab turli tarif rejalarini joriy etish ham ko‘zda tutilgan. Masalan, faqat avtobus uchun 1 kunlik tarif 11,5 ming so‘m, 5 kunlik tarif 42,5 ming so‘m, 30 kunlik tarif esa 250 ming so‘m bo‘ladi. Bir yilga mo‘ljallangan tarif 1,95 mln so‘m etib belgilanmoqda.
Avtobus va metrodan birgalikda foydalanish uchun 1 kunlik tarif 13,5 ming so‘m, 30 kunlik tarif 345 ming so‘m, yillik tarif esa 2,7 mln so‘m bo‘lishi taklif etilgan.
Cheksiz tarifi — faqat avtobus uchun
| Muddat | Qatnovlar soni | Chegirma | Narxi |
| 1 kun (24 soat) | 6 | 23% | 11 500 so‘m |
| 5 kun | 22 | 42 500 so‘m | |
| 1 hafta (7 kun) | 28 | 54 000 so‘m | |
| 10 kun | 44 | 84 500 so‘m | |
| 15 kun | 66 | 127 000 so‘m | |
| 20 kun | 88 | 169 500 so‘m | |
| 30 kun | 130 | 250 000 so‘m | |
| 1 oy | 130 | 250 000 so‘m | |
| 3 oy (90 kun) | 390 | 30% | 682 500 so‘m |
| 6 oy (180 kun) | 780 | 40% | 1 170 000 so‘m |
| 1 yil (365 kun) | 1 560 | 50% | 1 950 000 so‘m |
Transport kartasining cheksiz tarif rejasi — avtobus + metro
| Muddat | Qatnovlar soni | Chegirma | Narxi |
| 1 kun (24 soat) | 7 | 23% | 13 500 so‘m |
| 5 kun | 30 | 57 500 so‘m | |
| 1 hafta (7 kun) | 38 | 73 000 so‘m | |
| 10 kun | 60 | 115 500 so‘m | |
| 15 kun | 90 | 173 000 so‘m | |
| 20 kun | 120 | 231 000 so‘m | |
| 30 kun | 180 | 345 000 so‘m | |
| 1 oy | 180 | 345 000 so‘m | |
| 3 oy (90 kun) | 540 | 30% | 945 000 so‘m |
| 6 oy (180 kun) | 1 080 | 40% | 1 620 000 so‘m |
| 1 yil (365 kun) | 2 160 | 50% | 2 700 000 so‘m |
Shuningdek, transport kartalari orqali 10, 20 va 30 martalik safarlar paketlari ham belgilanadi. Ularning narxi 23% chegirma bilan mos ravishda 19 ming, 38,5 ming va 57,5 ming so‘mni tashkil etadi.
Loyihada bir soat ichida avtobus va metro o‘rtasida almashib foydalanish uchun alohida tariflar ham nazarda tutilgan. Masalan, birinchi avtobus uchun 2,5 ming so‘m, ikkinchi avtobus uchun 1,5 ming so‘m, uchinchi va undan keyingi avtobuslarda esa to‘lov olinmaydi. Metrodan foydalanilganda ham belgilangan almashish tartibiga qarab 1,5 ming so‘mlik to‘lov qo‘llanadi.
Bir soatlik tarif bo‘yicha hisob yo‘lovchi birinchi transportga chiqqan vaqtdan boshlanadi. Metrodan ushbu tarif doirasida bir soat ichida faqat bir marta foydalanish mumkin. Metrodan ikkinchi marta foydalanilganda yangi 60 daqiqalik hisob davri boshlanadi.
Qaror loyihasi bo‘yicha jamoatchilik muhokamasi 19-sentabrgacha davom etadi.
Avvalroq Spot Toshkent avtobuslariga chiqishda to‘lov joriy etilgach, yo‘lkira to‘lamaganlar soni oshgani haqida yozgan edi.
