2026-yilning to‘qqiz oyida O‘zbekistonga xorijdan pul o‘tkazmalari hajmi $15 mlrd dan ortiqni tashkil etdi. Bu haqda Markaziy bankning ichki valyuta bozori sharhida keltirilgan.
Unga ko‘ra, yanvar-sentabr oylarida mamlakatga xalqaro pul o‘tkazmalari orqali $15,2 mlrd kelib tushgan. Bu 2025-yilning mos davridagi $13,9 mlrd ga nisbatan qariyb 9% ga, 2024-yildagi $11,3 mlrd ga nisbatan esa 34,6% ga ko‘pdir.
Shu bilan birga, O‘zbekistondan chiqib ketgan mablag‘lar hajmi 2025-yilning yanvar-sentabr oylaridagi $1,93 mlrd ga nisbatan biroz oshib, $1,95 mlrd ga yetdi. 2024-yilning shu davrida bu ko‘rsatkich $2,06 mlrd ni tashkil etgan edi. Natijada xalqaro pul o‘tkazmalarining ijobiy saldosi $13,2 mlrd ni tashkil qildi.
Bundan tashqari, Markaziy bank jismoniy shaxslarning banklar bilan amalga oshirgan operatsiyalarining ijobiy saldosi ichki bozorda qo‘shimcha taklif manbai bo‘lib xizmat qilayotganini qayd etdi.
2026-yilning dastlabki to‘qqiz oyida aholi banklarga $18,9 mlrd lik xorijiy valyuta sotdi. Bu o‘tgan yilning mos davridagi $15,3 mlrd ga nisbatan 1,2 baravar ko‘pdir. Jismoniy shaxslarning valyuta sotib olish hajmi esa 27,9% ga oshib, $8,6 mlrd dan $10,9 mlrd ga yetdi.
Natijada fuqarolar tomonidan xorijiy valyuta taklifi unga bo‘lgan talab hajmidan $7,9 mlrd ga ortiq bo‘ldi.
Taqqoslash uchun, ijobiy saldo 2025-yilning shu davrida $6,7 mlrd ni, 2024-yilda esa $4,9 mlrd ni tashkil etgan edi.
Avvalroq Spot O‘zbekistonda xorijda ishlayotganlar soni 10 yilda ikki baravar kamaygani, pul o‘tkazmalari esa 4 karra oshgani haqida yozgan edi.
