Shavkat Mirziyoyev 26-may kuni kichik biznesni rivojlantirish uchun qulay shart-sharoitlar yaratish to‘g‘risidagi farmonni imzoladi. Savdo-sanoat palatasi hujjat matnini e’lon qildi.
Hujjat o‘sha kuni prezident huzurida kichik korxonalar uchun iqtisodiy sharoitlar va tartibga solish muhitini yaxshilash bo‘yicha o‘tkazilgan yig‘ilishda belgilangan qadamlarni mustahkamlaydi.
Maqsadlar qatoriga shaffof soliq bazasini kengaytirish va adolatli soliq solish tamoyili asosida soliq ma’muriyatchiligini takomillashtirish kiradi.
2026-yil 1-iyundan boshlab umumiy soliq rejimiga o‘tish chegarasi — ya’ni, foyda solig‘i va qo‘shilgan qiymat solig‘ini to‘lash — 12 ming BHMgacha (4,944 mlrd so‘m) oshiriladi.
Umumiy ovqatlanish, savdo va xizmat ko‘rsatish korxonalari ixtiyoriy ravishda soliq solishning soddalashtirilgan tartibiga o‘tishlari mumkin. Bunda ular foyda solig‘idan ozod qilinadi va tovar va xizmatlarni realizatsiya qilganlik uchun QQSni 6% stavkada to‘laydi.
Biroq, soddalashtirilgan tartib doirasida biznes sotib olingan tovarlar va xizmatlar uchun QQSni hisobga olish, to‘langan soliqning bir qismini qaytarib olish yoki boshqa imtiyozlardan foydalana olmaydi.
Bunda xaridorlarning ushbu korxonalardan xarid qilishda QQSni hisobga olish huquqi saqlanib qoladi.
Soliq solishning soddalashtirilgan tartibiga o‘tish yoki umumiy tartibga qaytish tegishli bildirishnoma yuborilganidan keyingi oyda amalga oshiriladi.
Umumiy soliqqa tortish tartibiga qaytgan taqdirda, kompaniya balansdagi tovar-moddiy zaxiralar va uzoq muddatli aktivlar qoldig‘i bo‘yicha QQSni hisobga olishni amalga oshirishi mumkin.
Soliq qo‘mitasiga bir oy muddatda savdo cheklari va elektron hisobvaraq-fakturalar uchun 6% stavkada QQS hisoblash tizimini ishlab chiqish topshirildi. Soddalashtirilgan tartib 2030-yil 1-yanvargacha amal qiladi.
Bundan tashqari, QQS to‘lovchisi guvohnomasidan faqat soliq solish maqsadlarida foydalaniladi. QQS to‘lovchisi guvohnomasini vaqtincha to‘xtatib turish, shuningdek, tovarlarni import qiluvchilarni QQS to‘lashga majburiy o‘tkazish tartibi bekor qilinadi.
2027-yil boshidan soliq xavfi past bo‘lgan vaziyatlarda QQSning salbiy summalarini qoplash inson omilisiz amalga oshiriladi. 10 million so‘mgacha bo‘lgan summalar qo‘shimcha tekshiruvlarsiz avtomatik ravishda qaytariladi.
Avvalroq Spot O‘zbekistonda xorijliklar uchun maxsus soliq rejimi joriy etilayotgani haqida yozgandi.
