2026-yilning yanvar-may oylari yakunlariga ko‘ra, O‘zbekistonning tashqi savdo aylanmasi $32,76 mlrdni tashkil qildi. Bu haqda Milliy statistika qo‘mitasi hisobotida keltirilgan.
O‘tgan yilning mos davriga nisbatan tovar aylanmasi 3,7% ga oshgan. Eksport 15,5% ga kamayib, $12,63 mlrdni tashkil etgan bo‘lsa, import 20,8% ga o‘sgan holda $20,12 mlrdga yetdi. Natijada tashqi savdo balansining taqchilligi (manfiy saldo) 4,4 baravarga — o‘tgan yilgi $1,7 mlrddan $7,48 mlrdgacha o‘sdi.
Yanvar-may oylarida nomonetar oltin yetkazib berish hajmi $1,5 mlrdni tashkil etdi, bu 2025-yilning shu davridagi ko‘rsatkichga ($6,49 mlrd) nisbatan 4,3 baravar kamdir. O‘tgan oyda O‘zbekiston aprelda qayta tiklangan oltin eksportini yana to‘xtatib qo‘ydi.
Xitoy O‘zbekiston bilan savdo bo‘yicha ishonchli yetakchilikni saqlab qolmoqda ($7,65 mlrd), ikkinchi o‘rinni $5,77 mlrd bilan Rossiya egallab turibdi. Yanvar-may oylarida XXR bilan savdo hajmi 42,3% ga, RF bilan esa 19,6% ga o‘sdi.
Shuningdek, tashqi savdo hamkorlarining kuchli beshligidan Qozog‘iston ($2,26 mlrd), Turkiya ($1,19 mlrd) va Afg‘oniston ($915,8 mln) o‘rin oldi. Asosiy hamkorlar o‘ntaligiga Fransiya ($771,9 mln), Janubiy Koreya ($747,8 mln), BAA ($746,6 mln), Germaniya ($501,9 mln) va Qirg‘iziston ($469 mln) ham kirdi.
Eksport
Oltinni hisobga olmaganda, sanoat mahsulotlari toifasi tovar eksportining asosiy moddasi bo‘lib qolmoqda. Besh oy davomida ularni yetkazib berishdan tushgan daromad $1,9 mlrd ga (+18%) yetdi.
To‘qimachilik ip-kalava va matolari eksportidan tushum $747,8 mlnni (+12,2%), rangli metallarni yetkazib berishdan esa $721,5 mlnni (+9,2%) tashkil etdi. Shuningdek, noruda qazilmalardan tayyorlangan mahsulotlar ($144,8 mln, +43,4%), metall buyumlar ($117,8 mln, +45,6%), shuningdek, cho‘yan va po‘lat ($113,9 mln, 2,3 baravar o‘sish) eksporti ham sezilarli darajada o‘sdi.
Turli tayyor mahsulotlar eksporti hajmi $1,06 mlrdni (+99,7%) tashkil etdi. Kiyim-kechak yetkazib berishdan tushgan daromad $520,7 mln ga (+34,8%) teng bo‘ldi, bunda “boshqa toifalarga kiritilmagan turli tayyor buyumlar” toifasi bo‘yicha 4,2 baravar — $500 mlngacha o‘sish qayd etildi.
Kimyo mahsulotlari eksporti hajmi $1,04 mlrdni (+37,6%) tashkil etdi. Noorganik kimyoviy moddalar 59,8% ga — $656,9 mlngacha o‘sishni ko‘rsatdi. Keyingi o‘rinni o‘g‘itlar yetkazib berish egalladi — $165 mln (-0,6%).
So‘ngra oziq-ovqat mahsulotlari keladi — $1,01 mlrd (+9,1%). Bu yerda asosan sabzavot va mevalar ($654 mln, +2,5%) hamda donli ekinlar ($250,9 mln, +21,2%) ustunlik qiladi.
Mashinasozlik mahsulotlarini yetkazib berish 38,2% ga o‘sib, $536 mlnga yetdi. Ushbu segmentda eksportning asosiy moddasini elektr mashinalari, apparatlar va asboblar tashkil etdi — $109,4 mln (+20,6%). Keyingi o‘rinlarda boshqa transport uskunalari — $107,2 mln (+54,5%) va avtomobillar — $105,5 mln (+3,3%) turibdi, shundan $90,3 mln (+2,5%) qism va butlovchi buyumlar hissasiga to‘g‘ri keldi.
Yoqilg‘i-energetika resurslarini yetkazib berish $660,7 mlngacha (+10,1%) oshdi. Neft va neft mahsulotlari eksporti $357,7 mlndan (+69,8%) oshdi, tabiiy gaz eksporti esa $202,9 mlnni tashkil etdi (1,42 baravar pasayish). Elektr tokini yetkazib berish 1,8% ga qisqarib, $98,8 mlnni tashkil etdi.
O‘z navbatida, xizmatlar eksporti hajmi $4,59 mlrdni, ya‘ni umumiy savdo eksportining 36,3% ini tashkil etdi. 2025-yilning yanvar-may oylariga nisbatan xizmatlar yetkazib berish 34,9% ga oshdi. Ularning tarkibida turizm ($2,24 mlrd), transport ($1,66 mlrd) va IT-sohasi ($441,8 mln) yetakchilik qilmoqda.
Import
Tovarlar importi tarkibida mashinasozlik mahsulotlari $6,66 mlrd (+20,5%) bilan yetakchilik qilmoqda. Avtomobillar va boshqa transport vositalarini yetkazib berish $1,55 mlrd (+25%), elektrotexnika — $1,15 mlrd (+46,1%), umumiy sanoat uskunalari — $979 mln (-1,6%), maxsus mashinalar — $967,4 mln (-11,7%), energiya generatorlari — $677,8 mln (+59,1%), aloqa va audio apparaturalari esa $653,9 mln ni (+81,7%) tashkil etdi.
Yil boshidan buyon avtomobillar uchun ehtiyot qismlar va butlovchi buyumlar olib kirish $723,1 mlnni (+7,9%) tashkil etgan bo‘lsa, yengil avtomobillar va boshqa transport vositalari importi $599,8 mlnga (1,84 baravar o‘sish) yetdi.
Ikkinchi o‘rinni sanoat mahsulotlari egallaydi — $3,07 mlrd (+12,8%). Cho‘yan va po‘lat ($1,25 mlrd, +8,2%) hamda rangli metallar ($453,6 mln, 2 baravar o‘sish) importi oshdi. Shu bilan birga, metall buyumlar importi $384,5 mlngacha (-5%) kamaydi, to‘qimachilik ip-kalava va matolari importi esa $244 mlngacha (+8,8%) o‘sdi.
Kimyo sanoati mahsulotlari importi 15,9% ga — $2,47 mlrdgacha o‘sdi. Tibbiyot va farmatsevtika tovarlariga sarflangan xarajatlar $794,9 mlnga (+2,6%), birlamchi plastmassalarga — $450,7 mlnga (+13,7%), kimyoviy materiallar va mahsulotlarga esa — $343,7 mlnga (+13,0%) yetdi.
Shuningdek, xorijiy oziq-ovqat mahsulotlarini olib kirish $2,31 mlrddan (+42,3%) oshdi. Donli ekinlar yetkazib berishga $632,5 mln (+63,5%), go‘sht va go‘sht mahsulotlariga — $393,6 mln (+46,9%), shakar va qandolat mahsulotlariga — $296,4 mln (+51,1%), sabzavot va mevalarga — $284 mln (+32,4%), qahva, choy, kakao va ziravorlarga esa $214,3 mln (+14,6%) sarflandi.
Yoqilg‘i-energetika resurslarini yetkazib berish 31,7% ga o‘sib, $1,86 mlrdga yetdi.
Neft va neft mahsulotlari importi $1 mlrdgacha (+15%) oshdi, shundan $794,2 mln (+11,8%) yoqilg‘i-moylash materiallari hissasiga to‘g‘ri keldi. Benzin importi 85,1% ga o‘sib, $373,4 mlnni, dizel yoqilg‘isi importi esa 2% ga oshib, $226,8 mlnni tashkil etdi. Gaz importi 84,1% ga ko‘payib, $724,7 mlnga yetdi, shundan $68,2 mlni propan (3,3 barobar o‘sish) hissasiga to‘g‘ri keldi. Ko‘mir xarid qilish xarajatlari $74,2 mlnni (-5,6%), elektr energiyasi uchun xarajatlar esa $55,1 mlnni (-15,5%) tashkil etdi.
Bundan tashqari, umumiy importning 10,2% ini tashkil etuvchi xizmatlar importi hajmi 14,7% ga o‘sib, $2,05 mlrdga yetdi. Sayohatlar (turizm) xizmatlarning yetakchi segmenti bo‘lib qolmoqda, bu ko‘rsatkich $919,4 mlnni tashkil etdi. Keyingi o‘rinlarda transport ($490 mln) va IT sohasi ($224,7 mln) turibdi.
Spot, avvalroq, import tovarlari uchun elektron tasdiq olish tartibi tasdiqlangani haqida yozgandi.
