Toshkent va Farg‘ona viloyatlarida fuqarolarni Umraga yuborish evaziga pul olgan shaxslar qo‘lga olindi. Bu haqda DXX xabar berdi.
Toshkent tumanida yashovchi, 1984-yilda tug‘ilgan shaxs tegishli litsenziyaga ega bo‘lmagan holda fuqaroni tanishlari orqali Umra ziyoratiga yuborishni va‘da qilgan.
Buning evaziga u $1,1 ming talab qilgan. Gumonlanuvchi $1 ming va 1,2 mln so‘mni olayotgan vaqtida ushlandi.
Dang‘ara tumanidagi turistik firma menejeri Uchko‘prik tumanida yashovchi ikki fuqaroni Umra safariga yuborish evaziga $2,2 ming olgan vaqtida qo‘lga olindi.
Har ikki holat bo‘yicha jinoyat ishlari qo‘zg‘atilib, tergov harakatlari olib borilmoqda.
O‘zbekistonda Umra tadbirlarini tashkil etish
2024-yilning iyun oyida qabul qilingan qaror bilan “Umra” ziyorati bo‘yicha xizmatlar ko‘rsatish litsenziyalanadigan faoliyatning alohida turi sifatida belgilandi. Litsenziya berish vakolati esa Turizm qo‘mitasidan Din ishlari bo‘yicha qo‘mitaga berildi.
Sentabr oyida qo‘mita mazkur tadbirlarni tashkil etayotgan turoperatorlarga ogohlantirish bilan chiqib, yangi talablar 5-oktabrdan kuchga kirishini, turoperatorlar litsenziyalari mazkur sanagacha amalga qilishini qayd etdi.
Undan keyin, 12-oktabrga kelib, hukumatning tegishli qarori qabul qilindi. Unda turistik tashkilotlar mazkur xizmatlar uchun yangi talablar asosida litsenziya olishlari kerakligi belgilandi.
15-oktabr kuni qo‘mita yangi talablar asosida litsenziya olish uchun arizalar qabulini e’lon qildi. Noyabr oyida, tanlov natijasida “Umra” ziyoratini tashkil etish va o‘tkazish faoliyatini amalga oshirish uchun 12ta turoperatorga litsenziya berildi.
Spot litsenziya olishdagi yangi talablar yuzasidan bir qator turoperatorlar bilan suhbatlashib, bu qanday qiyinchiliklarga olib kelgani, narxlarga qanday ta’sir qilishi hamda kelgusida kutilayotgan natijalar haqida fikrlarini o‘rgangandi.
2025-yilning avgustida O‘zbekistonda Umra safarlarini noqonuniy tashkil etayotgan shaxslarni aniqlash maqsadida “Sirli mijoz” yashirin nazorat tadbirlari amalga oshirilishi haqida xabar berilgandi.
Spot, avvalroq, Toshkent va Farg‘onada fuqarolarni Umraga yuborishni va‘da qilgan shaxslar aniqlangani haqida yozgandi.
