Avvalroq Spot pochta aloqasi milliy operatori O‘zbekiston pochtasi (UzPost) aksiyadorlari Wildberries’dan 100 mlrd so‘mlik kreditni ma’qullamagani haqida yozgandi. Mablag‘larni Markaziy bankning qayta moliyalash stavkasida jalb qilish taklif etilgan.
UzPost matbuot xizmati Spot’ga qarz mablag‘larini jalb qilish bo‘yicha izoh berdi. Kompaniya 21-sentabr kuni bo‘lib o‘tgan aksiyadorlarning umumiy yig‘ilishi kun tartibiga Vayldberriz MCHJning sho‘ba korxonasi bo‘lgan WB INT EKSPORT MCHJdan yirik miqdorda qarz mablag‘larini jalb qilish masalasi kiritilganini tasdiqladi.
Kompaniyaning ma’lum qilishicha, qarz mablag‘larini UzPost moddiy-texnik bazasini yangilash, jumladan, avtotransport, kompyuterlar va tashkiliy texnika xarid qilish, pochta aloqasi tarmog‘ini kengaytirish hamda bino va inshootlarni modernizatsiya qilishga yo‘naltirish rejalashtirilgan edi.
Wildberries matbuot xizmati Spot so‘roviga javoban kompaniya vakillarining UzPost kuzatuv kengashining yangi tarkibiga kiritilishi haqida izoh berdi. Avvalgi kuzatuv kengashi vakolatlari muddatidan oldin tugatilgan.
“O‘zbekiston pochtasi kuzatuv kengashi tarkibiga Wildberries vakillari pochta operatorini modernizatsiya qilish, ko‘rsatilayotgan xizmatlarning sifati va tezligini oshirish maqsadida kiritildi. Eng yirik savdo platformalaridan birining vakillarining kuzatuv kengashiga kirishi mamlakatda elektron tijoratni rivojlantirishga ijobiy ta’sir ko‘rsatadi. Pochta xizmati odatdagi rejimda ishlashda davom etadi va investitsiyalar hamda texnologik ko‘mak hisobiga rivojlanish uchun yangi imkoniyatlarga ega bo‘ladi”, — deyiladi kompaniya izohida.
Kengash tarkibiga WB INT EXPORT MCHJ bosh direktori Akmal Primkulov, RVB MCHJ investitsiyalar va nazorat departamenti direktori Yevgeniy Mitin, RVB MCHJ yuridik departamenti direktori o‘rinbosari Emil Xasyanov, RVB MCHJ moliyaviy direktori Pavel Logunov va WB Bank MCHJ hududiy rivojlanishni boshqarish departamenti direktori Aleksandra Xmelyova kirdi.
Shuningdek, yangi Kuzatuv kengashi tarkibiga Raqamli texnologiyalar vazirining birinchi o‘rinbosari Oleg Pekos, Hisob palatasi mutaxassisi Shaxzod Usarov, Iqtisodiyot va moliya vazirligi boshqarma boshlig‘i Muzzaffar Astonaqulov va mustaqil a’zo Rojer Kruk (Roger Crook) kirdi.
Pochta masalasi
2025-yil iyun oyida UzPost’ning affillangan shaxslari ro‘yxatida o‘zgarishlar yuz berdi. Undan Aloqabank, Iqtisodiyot va moliya vazirligi, shuningdek ustav kapitalining 20% dan ortig‘i Iqtisodiyot va moliya vazirligiga tegishli bo‘lgan yuridik shaxslar chiqarildi. Ularning o‘rniga Davlat aktivlarini boshqarish agentligi (DABA), unga aloqador yuridik shaxslar hamda O‘zbekiston Milliy investitsiya jamg‘armasi (UzNIF) kiritildi.
Uchta yangi subyektning barchasi UzPost’da 20% va undan ortiq ulushga ega. Bundan tashqari, sentabr oyida dastlab UzNIFga o‘tkazilishi rejalashtirilgan UzPost’ning 25% lik ulushi Davlat aktivlarini boshqarish agentligiga o‘tdi.
12-oktabr kuni UzPost xususiylashtirilgani haqida ma’lumot paydo bo‘ldi. Kompaniyadagi davlat ulushini Rossiyaning marketpleysi sotib olgani, xususan, Wildberries nomi tilga olingan.
Ertasi kuni UzPost xususiylashtirish haqidagi xabarlar fonida investorlarni jalb qilish rejalari borligini tasdiqladi. Kompaniya elektron tijoratning rivojlanishi va an’anaviy pochta xizmatlariga talabning kamayishi sharoitida xizmatlarni diversifikatsiya qilish, qulaylik va texnologik imkoniyatlarga bo‘lgan talab ortayotganini qayd etdi.
UzPost ma’lum qilishicha, investitsiyalar infratuzilmani modernizatsiya qilish, logistika tizimini rivojlantirish, raqamli yechimlarni joriy etish, pochta bo‘limlari tarmog‘ini, jumladan, qishloq joylarda kengaytirish hamda pochta jo‘natmalari va posilkalarni qayta ishlash hamda yetkazib berish uchun zamonaviy quvvatlarni yaratishga yo‘naltiriladi.
Undan keyin vaziyatdan xabardor manba Spot’ga davlat ulushini RVB — Wildberries & Russ birlashgan kompaniyasi sotib olganini ma’lum qilgandi. Rossiya bozoridagi ikki manbaga tayanib, RBC ham Wildberries pochta operatorini xususiylashtirish jarayonida ishtirok etganini yozdi. Suhbatdoshlardan biri marketpleysning O‘zbekistondagi rejalari keng ekanini bildirgan.
Uzum raqamli ekotizimi ham UzPost’ga investitsiya kiritishga, shuningdek Uzum Market’dagi barcha buyurtmalarning 10% igacha bo‘lgan qismini pochta infratuzilmasi orqali yetkazib berish hajmini oshirishga tayyorligini bildirdi. Guruh yaqin 3−4 yil ichida O‘zbekistonga jami $1,5 mlrd investitsiya kiritishni rejalashtirayotganini ma’lum qildi. Keyinroq Uzum UzPost uchun o‘tkaziladigan savdolarda ishtirok etish uchun ariza topshirganini bildirgan.
Ekotizimda pochta xizmati davlatning eng muhim aktivlaridan biri sifatida uni boshqarish nafaqat biznes, balki milliy manfaatlarni ham hisobga olgan holda amalga oshirilishi kerakligi ta’kidlandi.
“Pochta bir qator muhim ijtimoiy funksiyalarni bajaradi, butun mamlakat bo‘ylab minglab ish o‘rinlarini ta‘minlaydi va aynan O‘zbekiston IT-kompaniyasi bilan sinergiya samaradorlik va ijtimoiy ish o‘rtasidagi muvozanatni saqlashga, shuningdek, UzPost’ning barcha hamkorlari, xoh o‘zbekistonlik yoki chet ellik o‘yinchilar, xoh yirik yoki kichik biznes bo‘lsin, manfaatlarini muvozanatlashtirishga imkon beradi”, — deyiladi xabarda.
Oktabr oyida Korrupsiyaga qarshi kurashish agentligi DABA’dan pochta operatoridagi 29,4% lik davlat ulushini sotish bo‘yicha savdolarning ochiqligi va shaffofligini ta’minlashni talab qildi. Idora xususiylashtirilayotgan aktivlar haqidagi ma’lumotlarni Ochiq ma’lumotlar portalida e’lon qilish bo‘yicha qonunchilik talablarini eslatdi.
2025-yil kuzida UzPost’dagi 25% lik davlat aksiyalari paketi o‘tkazilgan Davlat aktivlarini boshqarish agentligi joriy yilning sentabr oyida milliy pochta operatori UzPost qisman xususiylashtirilgani haqidagi xabarlarga ilk bor izoh berdi. DABA rahbari o‘rinbosari Alisher Miraliyev Spot’ga bergan intervyusida bunday xabarlar asossiz ekanini aytdi.
“Agar aksiyador almashganida, qimmatli qog‘ozlar bozori qonunchiligida talablar bor: emitentning o‘zi mulkchilikdagi o‘zgarishlarni majburiy ravishda e’lon qiladi. Shuning uchun bu faqat mish-mishlar bo‘lgan, hech qanday asos yo‘q”, — dedi Miraliyev.
Shu bilan birga, hozirda UzPost’ni sotish bo‘yicha muzokaralar olib borilmayapti. Kompaniya faoliyatini davom ettirmoqda va rivojlanmoqda, ayni paytda uni xususiylashtirish bo‘yicha qaror qabul qilinmagan.
Avvalroq GM UzAuto Motors xususiylashtirilganda uni sotib olishda ustuvor huquqqa ega bo‘lmasligi haqida yozgan edi.
