O‘zbekiston 2027-yilda Uzbekistan Airways va O‘zbektelekom aksiyalarini xalqaro bozorlarda joylashtirishni rejalashtirmoqda. Bu haqda Gazeta.uz bosh vazir o‘rinbosari — iqtisodiyot va moliya vaziri Jamshid Qo‘chqorovga tayanib yozmoqda.
Qo‘chqorov bu haqda u o‘zaro bog‘liqlikni yaxshilash, xususiy investitsiyalarni jalb qilish va ochiq savdoni rivojlantirish bo‘yicha mintaqaviy hamkorlik bo‘yicha seminarda ma’lum qildi.
Tadbir 29-iyun kuni Toshkentda Xalqaro valyuta jamg‘armasi va Jahon banki guruhining mamlakat uchrashuvi (constituency meeting) doirasida bo‘lib o‘tdi.
Qo‘chqorovning so‘zlariga ko‘ra, o‘zaro bog‘liqlik va xususiy investitsiyalar muhokamasida sohadagi davlat korxonalariga e’tibor qaratilmagan.
Transport, aviatsiya va raqamli aloqani rivojlantirish ushbu sohalarda faoliyat yuritayotgan kompaniyalarni isloh qilmasdan mumkin emas, dedi u.
“Agar biz temir yo‘llar haqida gapiradigan bo‘lsak, temir yo‘l kompaniyalarini isloh qilishimiz, ularni o‘zgartirishimiz kerak va biz buni qilyapmiz. Agar biz raqamli o‘zaro bog‘liqlik haqida gapiradigan bo‘lsak, bizga yaxshi telekommunikatsiya kompaniyasi kerak. Biz uni o‘zgartirishimiz kerak”, — deya qo‘shimcha qildi bosh vazir o‘rinbosari.
Shuningdek, Qo‘chqorov aviatsiya sohasini rivojlantirish uchun aviakompaniyalarni isloh qilish zarurligini ta’kidladi. Hukumat o‘zaro bog‘liqlik sohasiga tegishli tartibga solinadigan sektorlardagi kompaniyalarni chuqur o‘zgartirish niyatida.
“Masalan, kelgusi yilda Uzbekistan Airways kompaniyasini IPOga olib chiqishni rejalashtirmoqdamiz. Shuningdek, O‘zbektelekom'ning IPOsi ham kelgusi yilga mo‘ljallangan. 2028-yilda, ehtimol 2029-yilda esa o‘zaro bog‘liqlikka aloqador barcha kompaniyalarni ham IPOga chiqaramiz”, — dedi u.
15-iyun kuni Shavkat Mirziyoyev bilan bo‘lib o‘tgan yig‘ilishda milliy aviatashuvchining transformatsiyasini jadallashtirish va uni jahon kapital bozoriga chiqishga tayyorlash rejalari ko‘rib chiqilgan edi. Gap joriy yil oxirigacha xalqaro IPO orqali kompaniya aksiyalarining 15−20%ini sotish rejalari haqida bordi.
Iqtisodiyot va moliya vazirligi o‘tgan hafta Uzbekistan Airways’ni ijtimoiy ahamiyatga ega tashkilot maqomiga ega bo‘lgan 425 ta kompaniya reyestriga kiritdi. Amaldagi talablarga ko‘ra, 2027-yil 1-yanvardan boshlab kompaniya buxgalteriya hisobini rasman moliyaviy hisobotning xalqaro standartlariga (MHXS) o‘tkazishi kerak bo‘ladi. 2028-yil oxirigacha moliyaviy hisobotlarni auditorlik xulosalari bilan birga e’lon qilishni boshlash talab etiladi.
17-iyun kuni Templeton Global Investments Markaziy Osiyo bo‘yicha bosh direktori Marius Dan Uzbekistan Airways’ni IPOga chiqarish bo‘yicha tayyorgarlik ishlari iyul oyida boshlanishini ma’lum qildi. Aviakompaniya uchun aksiyadorlik maslahatchilari tanlanadi.
Avvalroq Shavkat Mirziyoyev O‘zbekiston yalpi ichki mahsuloti 2026-yilda $180 mlrdga yetishi mumkinligi haqida aytgandi.
