01
Nima bo‘ldi?
27-oktabr tongida O‘zbekistondagi foydalanuvchilar uchun Apple Pay xizmatiga kirish imkoniyati ochildi.
Bu haqda birinchi bo‘lib Prezident Administratsiyasi rahbari Saida Mirziyoyeva rasman ma’lum qildi, keyinroq Markaziy bank ham buni tasdiqladi.
Ishga tushirish hozircha test rejimida amalga oshirilmoqda, shu sababli ayrim foydalanuvchilarda kartani qo‘shishda qiyinchiliklar yuzaga kelishi mumkin.
02
Qaysi kartalarni ulash mumkin?
Ayni paytda Apple Pay faqat Visa va Mastercard kartalarini qo‘llab-quvvatlamoqda. Xizmatga quyidagi sakkizta bank kartalarini ulash mumkin:
- Uzum — Visa;
- Orient Finans Bank — Visa va Mastercard;
- O‘zmilliybank — Visa va Mastercard;
- Kapitalbank — Visa va Mastercard;
- Hamkorbank — Visa;
- Ipak Yuli Bank — Visa va Mastercard;
- TBC Bank — Visa va Mastercard;
- Octobank — Visa va Mastercard.
Hamma kartalarni ham ulash imkoni yo‘q: foydalanish imkoniyati bank va karta turiga bog‘liq. Banklar ro‘yxati kengayib boradi.
03
Uzcard va Humo kartalarini ulash mumkinmi?
Hozircha yo‘q. Ayni paytda Apple Pay faqat Visa va Mastercard xalqaro tizimlari bilan ishlamoqda.
Biroq Markaziy bank Humo va Uzcard kartalarini ulash bo‘yicha ishlar olib borilayotgani va tez orada ular ham qo‘llab-quvvatlanishini ma’lum qildi. Aniq muddatlar hozircha aytilmagan.
04
Ulash uchun nimalar kerak?
Apple Pay’ni sozlashdan oldin quyidagilar mavjudligiga ishonch hosil qiling:
- iOS tizimining so‘nggi versiyasi o‘rnatilgan iPhone;
- Apple ID akkauntiga kirilgan profil;
- sozlangan Face ID, Touch ID yoki parol-kod;
- xizmatni qo‘llab-quvvatlaydigan bankning Visa yoki Mastercard kartasi.
Kartani uch xil usulda qo‘shish mumkin: Wallet orqali, iPhone’dagi ilovalardan yoki bank ilovasi orqali.
05
Wallet orqali kartani qanday qo‘shish mumkin?
Wallet ilovasini oching va yuqori o‘ng burchakdagi “+” belgisini bosing. “Debet yoki kredit karta” (Дебетовая или кредитная карта) bandini tanlang va “Davom etish” (Продолжить) tugmasini bosing.
So‘ngra kartani iPhone’ning orqa paneliga yaqinlashtiring. Agar ma’lumotlarni o‘qish imkoni bo‘lmasa, ularni qo‘lda kiritishni tanlang.
Foydalanish shartlari bilan tanishib, ularni qabul qiling. Keyin bank kartaning qo‘shilishini tasdiqlashi kerak, masalan, SMS yoki elektron pochtaga kelgan kod yordamida. Muvaffaqiyatli tekshiruvdan so‘ng karta Wallet’da paydo bo‘ladi.
06
iPhone’dagi ilovalardan kartani qanday qo‘shish mumkin?
Bu usul avval qurilmada ushbu kartadan foydalangan bo‘lsangizgina to‘g‘ri keladi.
Wallet’ni oching va “+” tugmasini bosing. “iPhone'dagi ilovalardan” (Из приложений на iPhone) bo‘limida avval foydalanilgan kartalar taklif etiladi. Keraklisini tanlang va ko‘rsatmalarga amal qiling.
Agar bu bo‘limda mos karta bo‘lmasa, uni Wallet orqali qo‘lda kiritishga harakat qiling.
07
Bank ilovasi orqali kartani qanday qo‘shish mumkin?
Ayrim banklar Apple Pay’ni to‘g‘ridan to‘g‘ri o‘z ilovasidan ulash imkonini beradi. Bunda karta rekvizitlarini qo‘lda kiritish shart emas: tegishli funksiyani tanlash va qo‘shishni tasdiqlash kifoya.
Masalan, ba’zi bank ilovalarining asosiy ekranida “Apple Wallet’ga qo‘shish” (Добавить в Apple Wallet) banneri joylashtirilgan. Xuddi shunday tugma kartaning o‘z sahifasida ham mavjud. Tugmani bosing va ekrandagi ko‘rsatmalarga amal qiling. Tasdiqlangandan keyin karta Wallet ilovasida paydo bo‘ladi.
Harakatlar tartibi bankka qarab farq qilishi mumkin. Agar ulanish tugmasi bo‘lmasa, bank ilovasini yangilang yoki kartani oldingi ikkita usuldan biri orqali qo‘shing.
08
Apple Pay orqali qanday to‘lov qilish mumkin?
Apple Pay kontaktsiz bank kartalari qabul qilinadigan barcha joylarda to‘lovlarni amalga oshirish imkonini beradi. iPhone, Apple Watch va boshqa mos keluvchi qurilmalar yordamida to‘lov qilish mumkin.
Xaridni amalga oshirish uchun iPhone yon tugmasini ikki marta bosing, Face ID yoki parol kodi yordamida to‘lovni tasdiqlang va telefonni terminalga yaqinlashtiring. Ekranda to‘lov tasdiqlanishini kuting.
Face ID bilan: yon tugmani ikki marta bosing, Face ID yoki parol kodi yordamida to‘lovni tasdiqlang va telefonni terminalga yaqinlashtiring. Touch ID bilan: telefonni terminalga yaqinlashtiring va bosh tugmani bosing.
09
Asosiy kartani qanday tanlash mumkin?
Agar Wallet’ga bir nechta karta qo‘shilgan bo‘lsa, ulardan birini asosiy sifatida tanlash mumkin. Shunda u to‘lov paytida standart rejimda ishlatiladi. Buning uchun Wallet’ni oching, kerakli kartani bosib turing va uni kartalar ro‘yxatining boshiga surib o‘tkazing.
10
Agar kartani qo‘shish imkoni bo‘lmasa nima qilish kerak?
Avvalo, Apple Pay sizning bankingizni va aynan sizdagi karta turini qo‘llab-quvvatlashini tekshiring. Keyin iPhone’da iOS’ning so‘nggi versiyasi o‘rnatilganiga va bank ilovasi yangilanganiga ishonch hosil qiling.
Agar kartani baribir ulab bo‘lmasa, bankni qo‘llab-quvvatlash markaziga murojaat qiling. Hozirda xizmat sinov bosqichida, shuning uchun uning ishlashi bank va karta turiga qarab farq qilishi mumkin.
11
Android’dachi?
Mamlakatda Android smartfonlari uchun ham Google Pay ishga tushdi.
Qaysi banklar uni qo‘llab-quvvatlashi va kartani qanday ulash haqida Spot materialida tanishishingiz mumkin.
